Baucau – “Instituto Católico para a formação de professores” mak instituisaun ida ne’ebé kompromete an ba formasaun profesór/a ensinu báziku ba distritu hotu iha Timor-Leste. Institutu ida ne’e fó atensaun espesífika atu forma profesór profisionál ne’ebé kualifikadu loloos iha ambiente edukasaun nian tuir valór Evanjellu nian.

Iha loron sábadu, 21 Fevereiru 2015, Institutu halo graduasaun ba estudante na’in 51, inklui FMA ida, Ir Teresinha Belo iha municipio-Baucau.

Graduasaun hahú ho misa agradesimentu nian ne’ebé prezide husi Amu-Bispu Basílio do Nacimento. Iha nia omilia D. Basílio foka pontu ruma hodi komenta leitura sira. Uluknanai, nia husu atu hanoin kona-ba tempu iha ita-nia vida. “Tempu mak sasukat atu uza oinsá hodi halo dalan husi A to’o Z”. Husi tempu estuda, ba tempu hetan rezultadu no agora “tempu atu uza matenek ba maluk sira”. Nu’udar sarani, profisionál sira presiza uza sira-nia kompeténsia ba ema seluk, halo karidade. Daruak, D. Basílio husu atu graduadu sira sai mestre atu hanorin matenek, hodi hanorin ema hili dalan ne’ebé loos,  “hodi fó kritériu sira”. Maibé atu halo ida-ne’e, Amu-Bispu dehan katak mestre sira mak uluknanai tenke moris iha lialoos. Nia husu ba graduadu sira atu halo tuir didi’ak sira nia profisaun hodi sai edukadór no serví-na’in iha sosiedade tuir valór Evanjellu nian, sai nu’udar bibi-atan di’ak ba labarik sira ne’ebé sira sei hasoru.

Depoizde misa iha serimónia graduasaun ne’ebé realiza iha fatin município. Prezidente ba serimonia ida ne’e mak Amu Basilio. Graduasaun hahú ho prosisaun akadémika hafoin hananu inu nasionál, hafoin aprezenta kandidatu /agraduasaun nian ba governadór ICFP, Don Basilio do Nacimento atu fó admisaun ba kandidatu sira. Tuirmai kontinua hodi fó prémiu exelénsia akadémika ICFP nian ba Ir. Teresinha de Assunção Belo, FMA.

Iha serimónia ida-ne’e Sr. Cancio Freitas eis Ministro edukasaun fó nia diskursu hodi dezafia no enkoraja graduadu sira atu sai kompetente iha mundu edukasaun hodi utiliza metodolojia foun iha ensinu-aprendizajen no sai edukadór/a ne’ebé hadomi nia profisaun hodi fó kualidade ba nia knaar tanba ida ne’e nu’udar vokasaun no misaun ida ne’ebé sira halao. Hafoin kontinua ho almosu konfraternizasaun nian.

Partisipa iha serimónia ida ne’e inan-aman husi graduadu/a sira kuaze 100, dosente sira no pesoál ICFP, membru governu lokál no nasionál balun, diretór edukasaun Municipio Baucau nian, doadores sira husi Australia, Asistente provinsiál Marista nian iha Australia no mós konvidadu seluk tan.

Buat hotu la’o di’ak no organizadu. Ema hotu kontente liu-liu graduadu sira no sira nia família. Tanba rezultadu husi sira nia sakrifisiu durante tinan 3 nian mak sira ku’u ona iha loron ida ne’e.