Redasaun/CNS – Iha kuarta liubá, kardeál Donald W. Wuerl Washington nian, nu’udar relatór jerál Sínodu nian, hato’o Relatio post disceptationem, hodi foka pontu sira ne’ebé iha semana rua nia laran bispu husi kontinente lima aprezenta kona-ba asaun evanjelizadora iha sira-nia fatin atuasaun nian no kona-ba tema sira evanjelizasaun foun nian.
Dokumentu ne’e fó vizaun jerál kona-ba situasaun no husi ne’e maka gia Padre Sinodál iha formulasaun prepozisaun sira halo iha grupu ki’ik sira nia laran.

Iha ninia aprezentasaun kardeál Wuerl fó hanoin fali esperiénsia sira ne’ebé Padre Sinodál sira halo husi liturjia ne’ebé selebra ho Amu-Papa to’o nia reflesaun inaugurál kona-ba ‘confessio’ no ‘caritas’.

 

Nia reflete kona-ba tema haat ne’ebé mosu iha intervensaun sira:

• Natureza evanjelizasaun foun nian.
• Kontestu Kreda nia ministériu ohin-loron.
• Resposta pastorál ba situasaun sira ohin-loron nian.
• Ajente/partisipante sira evanjelizasaun foun nian.

Kardeál Wuerl subliña katak “Maromak maka ko’alia no atua iha istória” no “evanjelizasaun sentrál iha Kreda nia moris”. Nia mós salienta “partisipasaun vitál katóliku ida-idak nian iha misaun evanjelizasaun nian”. Dezafiu maka oinsá halo leigu sira iha konxiénsia katak sira iha responsabilidade atu evanjeliza, halo sira-nia fiar sai sentrál iha sira-nia moris, no envolve iha misaun sosiál Kreda nian hodi tau matan ba kiak sira, ba moras sira, ba ema aleijadu sira, sai Kristu ohin.

Dezafiu ba Padre Sinodál sira maka komprende oinsá katekiza di’ak liután ema, hakle’an sarani sira-nia koñesimentu kona-ba fiar no sira-nia komprensaun kona-ba signifikadu sai Kristu nia eskolante. Bispu barak haktuir katak difisil atu halo adultu sira hola parte iha formasaun ba fiar. Tempu edukasaun relijioza iha eskola katólika mós ladún to’o no formadór sira mós lahó kualidade. Dalan sá de’it maka presiza atu bele komunika fiar, liuliu ba foin-sa’e sira?

Kardeál Wuerl konfirma katak bispu sira rekoñese parókia sira nu’udar fatin iha-ne’ebé Kreda nia moris buras. Nune’e importante atu parókia sira halo ema nia moris espirituál buras. Iha parókia, katekista, família, leigu/a sira no amlulik iha papél importante. Kardeál Wuerl halo pergunta ruma:  “Tempu to’o ona atu fó ba katekista ministériu instituidu no estavel iha Kreda laran?” “Oinsá Kreda apoia di’ak liután no gia família sira iha sira-nia ministériu krusiál ba fiar no valór umanu sira nia tranzmisaun?” “Oinsá Kreda integra ho modu integrál leigu sira iha kreda nia organizasaun lokál?” “Oinsá kreda haburas imperativu misionáriu foun iha amlulik sira?” “Oinsá semináriu sira forma jerasaun amlulik nian ho intensaun/hakaran evanjelizasaun nian?”

Iha diskusaun aberta, bispu sira identifika área ruma ne’ebé kardeál Wuerl ladún foka iha aprezentasaun hanesan “papél relijiozu sira nian, teólogu sira-nian, importánsia liturjia nian iha evanjelizasaun, hamoris fali sakramentu rekonsiliasaun, nesesidade ba definisaun ezata kona-ba evanjelizasaun, orasaun nia fatin iha evanjelizasaun foun ninia atualizasaun,  nesesidade na Kred ania konversaun, importánsia ba fafurak no kontemplasaun nu’udar meiu evanjelizasaun nian, papél pozitivu mundu nian iha evanjelizasaun, benefísiu no bensan sira Izlaun nian no partisipasaun membru ekumenikál sira”.

Servsiu importante liu hahú daudaun iha faze daruak Sínodu nian: hetan estratéjia atu hatán ba pergunta sira iha leten no lori tama Kreda ba evanjelizasuan foun.

Bispu Gerald F. Kicanas .Tradusaun no edit fmatinorg