Dili – Ema  ida – idak iha ninia talentus ne’ebé  simu nu’udar prezente husi Maromak, no ita nu’udar edukadora  tulun sira atu haburas sira nia talentus ne’ebé sira iha. Ho ne’e  iha  Oratorio Don Bosco – Balide oferese ba labarik no foinsa’e sira aktividade oioin grupo interese nian eh “Interest Group ”. Objetivu  mak hakarak atu promove  sira nia talentus no ho tempu hanesan tulun mós foinsa’e sira balun ne’ebé iha ona koñesimentu no kapasidade, atu hatene fahe sira nia matenek  ba ema seluk.

Nune’e, iha Oratorio Irman sira  hamutuk ho Animadores, oferese ba oratoriano sira grupo interese oi – oin hanesan; Suku, aprende lian Inglês ba foinsa’e sira no lian Português ba labarik sira, Viola, Pianica, Banda, Organ, Hakerek, Lee no Pinta  ba labarik sira; Livre ba sira atu aprende atividades sira ne’e tuir sira nia idaidak nia hilin. Hafoin iha loron festa, grupo idaidak ne’ebé pronto, bele aprezenta buat ne’ebé nia aprende durante ne’e.

Atividade nafatin halao iha loron Domingo durante oras ida nia laran, hafoin kontinua ho Katekeze hodi haklean Maromak nia liafuan, tamba ita la’os de’it tulun sira atu haburas an iha matenek ulun nian maibe liuliu, husi atividade ne’e bele tulun no gia sira atu hametin liu tan sira nia fiar nu’udar Sarani .