CN – Hanesan ita hatene, kuarta-kuarta Amu-Papa loke audiénsia jerál no hato’o ninia katekeze. Iha kuarta horisehik nia hahú siklu katekeze kona-ba “Fiar Sarani” ne’ebé sei kontinua durante Tinan Fiar nian. Santu-Padre enfatiza katak fiar sarani la’ós buat ruma restritu ba intelijénsia, ba kampu intelektuál, maibé envolve vida tomak: sentimentu sira, emosaun sira, razaun umana.
Amu-Papa destaka katak fiar iha Maromak hatudu katak domin de’it maka ema nia plenitude. Iha sentidu ne’e, ema hatún nia an, sai kiak se moris iha situasaun dominiu nian, arrogánsia nian, esplorasaun ema seluk nian.

Asesu kópia ho lia-portugés

 

“Fiar sarani, hala’o iha karidade no forte iha esperansa, la limita, maibé umaniza vida, defaktu halo nia sai plenamente umana”.
Amu-Papa esplika katak fiar katak hakohak Maromak nia revelasaun, ne’ebé hatudu mak ita Nia sé, oinsá nia atua, sá de’it ninia projetu ba umanidade. No iha revelasau, nafatin Maromak maka komunika nia An no ema iha kbiit atu rona Ninia Liafuan.
“Ne’e maka maravilla fiar nian: Maromak, iha nia domin, hakiak iha  ita – liuhusi Espíritu Santu – kondisaun adekuada sira atu ita bele rekoñese Ninia Liafuan. Maromak rasik, iha ninia hakaran atu manifesta An, tama iha kontaktu ho ita, halo nia An sai prezente iha istória, halo ita iha kapasidade atu rona Nia no simu Nia”.  
Kona-ba forma hasoru nian, buat ne’ebé ba fiar, Amu-Papa dehan, resposta maka Kredu. Nia destaka importánsia atu komprende didi’ak Kredu, liuliu rekoñese Kredu ida-ne’e.
“Koñese, defaktu, operasaun intelektuál de’it, enkuantu ‘rekoñese’ signifika nesesidade atu deskobre ligasaun kle’an entre lialoos ne’ebé ita haklaken iha Kredu no ita-nia moris loroloron, atu lialoos ne’e sai konkretu duni, naroman ba it-nia moris nia ain-hakat, bee ne’ebé irriga rai-manas iha ita-nia dalan, moris ne’ebé manán dezertu ruma ita-nia vida kontemporánea”.
Amu-Papa taka katekeze hodi reza atu dalan ne’ebé tenke halo iha Tinan Fiar nian tulun umanidade atu buras iha fiar no domin, “atu ita aprende moris, iha hilin no hahalok lorloron nian, moris di’ak no furak Evanjellu nian”.