Husi irmán Alexandrina Pinto FMA

Uluknanai ha’u agradese Na’i-Feto nia protesaun ne’ebé ha’u sente maka’as durante ami-nia peregrinasaun, maski ho dalan ne’ebé aat liu maibé viajen hotu la’o di’ak, sarani wain husi Diozese tolu ne’ebé partisipa iha peregrinasaun ida-idak fila ho di’ak hotu.

Ha’u halo esperiénsia únika no realiza duni ha’u nia mehi iha peregrinasaun ida ne’e. Ha’u nia objetivu mak ha’u hakarak bá atu agradese ba Na’i-Feto no reza iha Santuáriu Na’i-Feto nian hamutuk ho sarani sira seluk, halo sakrifísiu uitoan atu bele manán induljénsia plenária. Ami sai husi Balide kuaze tuku 7 dadeer, loron 13 no to’o kuaze tuku 12 iha Soibada; to’o iha fatin buat hotu la iha, ezemplu bee la iha, fatin atu hela la favorese maibé ha’u nafatin iha entuziasmu atu tau di’ak sasán sira no han lalais atu ba kumprimenta Na’i-Feto  no agradese ba ami nia viajen.

 

Esperiénsia dahuluk: Ha’u-nia partisipasaun iha misa ba moras sira nian, ha’u mós moras ida

Iha oráriu tuku rua iha Misa ba moras sira, nune’e molok tuku rua ami haka’as-an atu prontu ona, maibé misa hahu tuku 4 entaun ha’u iha  posibilidade barak atu reza, esperiénsia únika ne’ebé ha’u sente kona liu mak wainhira misa ba moras sira, durante misa mosu sentimentu rua  ne’ebé sente maka’as;  Jezús nia domin bo’ot mai ha’u hodi fó isin-di’ak mai ha’u, ha’u hanoin fali ha’u-nia operasaun uluk,  no tuir mai sente katak  ha’u la merese atu agradese Na’i, wainhira ha’u hetan  isin-di’ak, tanba ha’u Jezús nia prezensa  liuhusi doutór sira, tanba ne’e sente la merese, maibé ho liafuan mamuk ha’u agradese ba ha’u-nia doutór no enfermeira sira  ne’ebé tau matan ho domin boot mai ha’u. Ha’u mós reza atu liu husi doutór no enfermeira/u sira Jezús bele fo isin-di’ak ba ema barak. Ho esperiénsia ida-ne’e dala ida tan konfirma mai ha’u-nia fiar no atu sai maka’as liután iha Jezús nu’udar médiku ne’ebé kura ema barak inklui mos ha’u. No iha posibilidade ida ne’e, ha’u reza ba ema barak, membru família irmán sira-nian ne’ebé moras, família no moras hotu ne’ebé ha’u lori  iha ha’u-nia fuan atu reza ba sira. Depoizde misa iha prosisaun Santissimu Sakramentu ho ema barak nia partisipasaun.

Esperiénsia daruak: Maria nia prezensa

Tuirmai buat ne’ebé úniku liután mak  bainhira ha’u tama iha Santuáriu Na’i-Feto nian, sente katak ha’u tama iha Na’i-Feto nia uma, ninia prezensa ne’ebé maka’as liu hodi simu no pronta atu rona ita. Uluknanai ha’u agradese ba Na’i-Feto ba grasa wain ne’ebé ha’u simu. Hafoin iha momentu velada iha oportunidade di’ak atu  reza ba ema hotu liuliu ba irmán ida-idak iha ita-nia Inspetoria, katak hahú husi konselleira sira, diretora no komunidade no formanda sira, reza ba ita-nia Madre Jerál no Konselleira sirano mós ba foin-sa’e sira.

Loos duni, ita loroloron reza nafatin maibé úniku liu bainhira ita reza iha Santuáruo Na’i-Feto nian, ha’u reza atu ita aprende husi Nia, sai Maria nia oan ne’ebé di’ak, no liuliu atu hadomi no hametin liután ita-nia fiar katak Maria iha no halo buat hotu.

Obrigada barak.

Ir. Alexandrina Pinto fma