Husi irmán Angelita Gomes FMA

Peregrinasaun nasionál ba Santuáriu Na’i-Feto Aitara husi loron 12-14 Outubru 2012.

Peregrinasaun ne’e hala’o tinan-tinan iha fulan Outubru nia laran atu la’o ho sintonia ho peregrinasaun Fátima iha Portugál, maibé ba dioseze Baucau, peregrinasaun ida-ne’e marka abertura ofisiál Tinan Fiar nian, okaziaun ba sarani sira atu manán induljénsia plenária.  Iha peregrinasaun nasionál ne’e inklui husi Dioseze 3 iha TL. Bispu na’in rua, husi Dioseze Dili no Maliana maka tuir iha Peregrinasaun ne’e, enkuantu bispu Baucau nian la marka presenza tanba oras ne’e daudaun tuir hela Sínodu Bispu sira-nian iha Vaticano– Roma.

Peregrinu/a barak maka partisipa iha prosisaun, reza rozáriu, adorasaun no misa. Iha amululik barak mak mai hamutuk ho sira nia sarani sira. Sarani sira husi Soibada prepara fatin ba peregrinu/a seluk ho simplisidade no fiar tuir estilu la’o-rai nian. Ema barak ne’ebé halibur hamutuk iha ne’ebá, hatudu duni sira nia fiar no devosaun ba Na’i-Feto Aitara. Klima iha Santuáriu Soibada ajuda peregrinu sira atu reza no reflete, iha silénsiu no orasaun kontinua.

Iha loron 13 Outubru, tuku 4 lokraik selebra misa ba ema-moras sira ne’ebé depoizde misa Amu-Bispu na’in rua kose mina-sarani ba ema-moras sira. Durante omilia ba ema-moras sira Amu-Bispu Dom Norberto hateten katak, “ema moras keta hanoin barak kona-ba moras maibé hanoin de’it katak Jezús mós terus barak molok mate. Jezús besik liu ba ema-moras sira nia terus. Moras, terus no mate hola parte iha ema nia moris. Bainhira ita moris keta halo sala barak buka atu hamenus ita-nia sala la’ós iha tempu ita moras mak hakbesik ba Maromak maibé iha moris loroloron tenke hatudu fiar no hakribit sala nian”.

Depoizde misa sarani sira halo prosisaun ho Santíssimu Sakramentu hale’u Soibada. Ema barak mak partisipa iha prosisaun ne’e. Adorasaun tuir grupu hala’o iha fatin rua iha Santuáriu no Parókia. Komisaun organizadora fahe ona oráriu nune’e peregrinu sira tuir de’it. Peregrinu/a barak mak hadeer to’o loron atu reza, konfesa no halo adorasaun.

Iha loron 14 Outubru, ema barak tuir prosisaun Na’i-Feto Aitara husi Parókia ba Santuáriu no remata ho misa solene ne’ebé Amu-Bispu Norberto maka prezide. Iha omilia nia ko’alia kona-ba “Tinan Fiar nian” no liga ho Na’i-Feto nia fiar. Nia dehan: “Hanesan Evanjellu haktuir kona-ba festa kazamentu iha rai Kaná, Jezús nakfilak bee ba tua tanba Mari ania fiar, ita sarani husu Jezús atu haraik mai ita tua loos nian ne’ebé fó moris ba ita-nia isin no klamar. Tua ne’ebé Jezús fó maka tua salvasaun atu kasu ita ida-idak nia salan”. Iha Tinan Fiar nian, nia husu ba sarani sira atu hafoun ida-idak nia fiar iha Jezús Kristu.

Iha misa ne’e mós iha Mons. Rodrigo Bilbao reprezentante nunsiatura iha TL. Autoridade Nasionál balun mos partisipa iha prosisaun no misa solene. Prezidente Repúblika no ninia kaben, Vise PM Lasama, señor Ilídio Ximenes Sekretáriu Estadu ba SEPFOPE, nst.

Husi FMA sira marka prezensa komunidade sira husi Balide (aspirante, postulante, FMA), Laga no Baucau. Esperiénsia furak iha Soibada ba FMA sira maka ema-nia solidariedade no simun maski ema ne’ebé simu iha FMA sira ne’e ferik ida no feto-faluk, nia simu ho domin no simplisidade, Esperiénsia seluk maka orasaun nian. Iha ema barak mak hamrook ba Maromak nia Liafuan no domin. Peregrinu/a sira hatudu sira nia domin boot ba Na’i-Feto Aitara. Buat ida furak tan maka haree foin-sa’e sira hola inisiativa atu reza kle’ur ho hakmatek.loos.

“Na’i-Feto Aitara harohan mai ita hotu”.