Dili – Partisipante sira ba Kongresu anuál daruak Infánsia Misionária nian ohin halo sira-nia kompromisu atu moris Tinan Fiar nian. Sira-nia oráriu ohin hahú Eukaristia selebra husi P. Mouzinho, enkarregadu ba Obra Pontifísia Misionária, hafoin sira ba iha grupu ida-idak tuir proveniénsia atu prepara sira-nia kompromisu.

 

Tuirmai ne’e grupu ida-idak nia kompromisu.

 

Husi Fuiloro (labarik feto 31, mane 8): “Ami nu’udar labarik Infánsia Misionária Fuiloro nian, hakarak atu haklaken Jezús ho ami-nia liafuan, ami-nia hahalok no fó ezemplu si’ak ba kolega sira; badinas atu reza nafatin ba ema hotu ne’ebé presiza ami-nia orasaun”.

Husi Baucau (labarik feto 39, mane 16): “Ami, Infánsia Misionária husi Baucau, promete atu haklaken Maromak nia Liafuan liuhosi ami-nia enkontru sira no fó sasin kona-ba Jezús liuhosi ami-nia liafuan no hahalok”.

Husi Venilale (labarik no adolexente feto 68) hato’o sira-nia kompromisu nune’e: “Ami Infánsia Misionária husi Venilale, ho fuan no laran tomak, hakarak lori Jezús ba ami-nia uma liuhosi ami-nia hahalok hanesan:

• Reza ho fervór;
• Halo sakrifísiu;
• Sai ema ne’ebé onestu;
• Rona hodi halo tuir”.

Husi Laga (feto 39, mane 12): “Ami Infánsia Misionária husi Laga, hakarak ahto’o ami-nia kompromisu ba maluk sira hotu. Iha Tinan Fiar nianida-ne’e, ami hakarak atu:

• Hametin ami-ia fiar ba Jezús Kristu iha Eukaristia;
• Haklaken Maromak nia Liafuan ba ema seluk liuliu ba sira ne’ebé hadook an husi Igreja ka seidauk koñese Jezús;
• Tulun ema kiak sira ne’ebé la iha ema atu tau matan no tulun inan-aman;
• Rona inan-aman, profesór/a sira. Padre, madre sira no ema seluk;
• Kolabora ho badinas iha atividade Kreda nian liuliu iha ami-nia grupu laran”.

 

Husi Kailako (labarik feto 20, mane 6): “Ami Infánsia Misionária husi Kailako, promete atu badinas ba misa iha domingu hodi rona Jezús nia Liafuan no simu Jezús nune’e, Nia sai ami-nia kbiit atu hala’o ami-nia knaar no hametin ami-nia fiar, atu fó ezemplu di’ak ho ami-nia hahalok, hanoin. Liafuan iha uma, iha eskola no iha fatin hotu ne’ebé ami bá. Ami promete atu reza ami-nia orasaundadeer no kalan no reza ba ema se;uk no lee Liafuan Di’ak. Ami reza ba ami-nia papá no mamá no dada ami-nia papá no mamá atu ba misa domingu-domingu, no dada ami-nia maluk sira tuir oratóriu atu nune’e sira mós bele koñese no hadomi Jezús”.

Husi Balide-Dili (labarik feto 20, mane 3): “Ami Infánsia Misionária hosi Balide, promete atu reza loroloron, lee Bíblia no bá misa domingu-domingu, atu bele hametin liután ami-nia fiar, nune’e, ami bele sai labarik apóstolu ba labarik seluk, liuhosi ami-nia hahalok karidade ne’ebé hatudu ba ami-nia família no ba maluk sira”.

Husi Comoro-Dili (labarik no adolexente  feto 14 no mane 22): “Ami Infánsia Misionári Comoro nian promete sei fó tempu atu lee, refete, atu komprende Jezús nia moris iha Evanjellu hodi hametin ami-nia fiar no haklaken ba maluk sira ho ami-nia moris no liafuan”.

 

Hotu tiha sira-nia kompromisu, sira hamoos fatin sira uza durante loron hirak ne’e, han meiudia no filafali ba ida-idak nia hela-fatin, ho laran-manas atu moris tuir sira-nia kompromisu sintetiza iha prezente sabonete morin ida simu husi irmán Gianna ho mensajen iha lia-portugés: “Eu levo o perfume do Evangelho”, iha tetun “Ha’u lori Evanjellu nia morin/perfume”.