Kreda tenke halo “autokrítika”,  parese formasaun amlulik sira-nian “haliis atu halo sira sai funsionáriu ba eskritóriu oioiniha Kreda duké misionáriu sira ne’ebé nakonu ho domin ba Kristu”. Evanjelisazaun foun fali ezije “dinamizmu valór evanjéliku sira lialoos nian, justisa nian, domin nian, dame nian no armonia nian”. Ne’e mak apelu kardeál George Alencherry, xefe Sínodu Kreda Siro-Malabar, ne’ebé fó sai iha Kongregasaun Jerál da-9. Liafuan sira-n’e hanesan lia-hun ba konvite husi Dom Nikolaos Foskolos, arsebispu Atenas nian, ne’ebé dehan katak Kreda, atu haklaken Evanjellu ba ema sira sékulu da-221, tenke konsidera evanjelizasaun dahuluk ne’ebé Apóstolu sira halo, “ema iletradu, maibé nakonu ho espíritu fiar nian” no “konsege troka mundu nia oin”. Ohin fali Kreda “susar atu haklaken Maromak nia Liafuan”: husi parte ida iha progresu sientífiku no teknolójiku lahó Maromak no dala barak kontra Maromak, no husi sorin seluk imoralidade invade parte boot mundu nian.

 

Evanjelizasaun foun halo atu Dom Nikolaos Foskalos hanoin kona-ba funu entre Davíd no Golias: Kreda ohin tenke enfrenta inimigu jigante ne’ebé hakarak harahun nia: Nia iha naran barak: relativizmu, indiferentizmu, materializmu, edonizmu no “kilat boot sira no todan sira”. Kreda, tuir Saulo nia ezemplu, hakarak atu Davíd uza “kilat todan” sira. Nia presiza “isin-moris liután: tenke husik kostume sira mediuevu europeu nian no hala’o nia knaar la’ós nu’udar poténsia mundiál ka poténsia europeu”.  Bispu Ecuador nian Dom Jesús Esteban Sádaba Pérez mós haktuir katak dala barak ema konsidera Evanjellu nia prezensa  “nu’udar forma ida kolonizasaun nian”. Evanjellu la’ós “patrimóniu eskluzivu kultura ida-nian”, maibé “ema hotu bele no  tenke hakohak nia”. Presiza supera – Patriarka Venezia nian Dom Francesco Moraglia hateten – “kompleksu inferioridade hasoru kodernidade no posmodernidade” ne’ebé katóliku barak esperiénsia” tanba seidauk rezolve konflitu entre “fiar no razaun”.

Husi Patriarka Jeruzalém (Latinu nian), Fouad Twal, mai konvite  atu vizita Fatin Santu sira. Peregrinasaun, se hetan naroman husi Maromak nia Liafuan no liuhusi enkontru ho komunidad elokál, bele “fortifika fiar-na’in sira ho fiar uitoan no hamoris fali fiar iha sira ne’ebé nia fiar mate tiha ona”. Tuir Patriarka Twal,  Evanjelizasuan foun “atu sai moderna no efikás tenke hahú filafali husi Jeruzalém”, katak husi Fatinsira ne’ebé dexendente sira husi komunidade sarani dahuluk moris bá, “tuba rai metin iha Kristu”. “Rekursu  boot liu” ba evanjelizasaun foun tuir kardeál Odilo Pedro Scherer, São Paulo, Brasil, mai husi Santu sira, be iha Kreda nia istória sai “sarani auténtiku no evanjelizadór efikás”. Iha Rain ida-idak :sira tahan no sustenta sarani sira nia fiar” no sai mós “ezemplu ida moris nian”, enkuantu santuáriu sira sai “fatin fiar no konsolasun nia ba povu fiar-na’in”.

Husi Dom José Guadalupe Martín Rábago, arsebispu León, México nian, mai hanoin ida ba evanjelizasaun no ba purifikasaun devosaun populár sira-nian, atu keta sai de’it “sentimentalizmu folklór nian”. Bispu portugés António José Da Rocha Couto fali salienta katak Kreda tenke iha nafatin “karakterístika sira Jezús Kristu nian” no sai “filiál, fraterna, domin-na’in, besik ba ema no hatene simu sira” hanesan komunida sarani dahuluk: “neon-moris permanentemente ba Maromak nia Liafuan, ba komuñaun, ba silu-fahe paun no orasaun”, nun’e nia sai “Kreda ida foin-sa’e, isin-moris no furak, no ema sira hotu sei haka’as an atu tama iha nia laran”.  Kardeál Peter Trukson, prezidente Pontifísiu Konsellu ba  Justisa no dame, haree iha “sosiál, odamtan asesu nian ba evanjelizasaun”. Nia sujere atu halo ema koñese liután “santidade sosiál”, hodi halo ema koñese liután vida no obra sira santu sira ne’ebé serbisu iha kampu polítiku, sosiál hanesan beatu Giuseppe Toniolo, Robert Schuman no Alcide De Gasperi, hodi hatam iha pájina web Vaticano nian, iha lian kona-ba  testu fundamentál sira, aleinde Katesizmu Kreda Katólika nian, bele hetan mós Kompéndiu Doutrina Sosiál Kreda nian”.

Sábadu horisehik, semana dahuluk Sínodu nian taka ho Kongregasaun Jerál da-10 no domingu ohin la iha serbisu Sínodu nian, nune’e Padre sinodál sira bele goza loron ida feriadu nian.