Dili – Tinan Vida Konsagrada ne’ebé Amu-Papa Francisco promulga sai oportunidade di’ak ba Relijiozu/a sira iha Timor-Leste atu halo memória ba Maromak nia kmanek hotu no hafoun fali kompromisu no entuziazmu atu fó sasin ho modu atrativu Evanjellu no Reinu Maromak nian.

Iha tinan tomak sei iha atividade oioin atu hala’o iha nivel lokál no nasionál. Atividade nasionál ne’ebé halo husi loron 8-9 Fevereiru 2015 mak Adorasaun ida hamutuk hodi reflete votu kastidade, pobreza no obediénsia iha Katedrál Dili;  konferénsia kona-ba Amu-Papa nia Surat ba Konsagradu/a sira husi Mons. Joseph Salvador Marino, Núnsiu Apostóliku iha Haas-Laran/Canossianas; no selebrasaun eukarístika konkluziva hamutuk ho Bispu Basílio (Baucau) no Bispu Norberto (Maliana) iha Catedral. Bispu dioseze Dili, D. Ricardo la partisipa tan saude la permite, no tanba ne’e nia hato’o ona surat rezignasaun ne’ebé Amu-Papa mós aseita ona.

Relijiozu/a sira simu konvite atu iha Tinan ne’e, ne’ebé marka mós aniversáriu da-50 dokumentu Lumen Gentium no Perfectae Caritatis nian, atu reflete dokumentu rua ne’e. Ba Lumen Gentium, liuliu kapítulu VI.

Mons. Marino hateten katak ne’e mak enkontru daruak nia halo ho konsagradu/a sira iha Timor-Leste. Ida dahuluk (2014) mak enkontru kona-ba “Ksolok Evanjellu nian” (aprezentasaun Evangelii Gaudium nian) no ohin 9 Fevreiru ne’e, mak Papa Francisco nia Surat ba nia maun no biin-alin Konsagradu/a sira. Iha enkontru rua ne’e, nia sai portavós Papa Francisco nian.

Liafuan xave sira husi Amu-Papa nia liafuan sira mak “ksolok” no “laran-sadia”. Ne’e mak xave mós atu Kreda halo mudansa ba nia moris, mudansa ida konkreta, vizivel no efetiva. Nune’e, Mons. Marino husu ba konsagradu sira “Saida mak ita bele halo foun iha ita-nia komunidade sira?”.

Nia rekoñese relijiozu sira nia kontribuisaun boot ba evanjelizasaun iha Timor no hato’o agradesimentu, maibé nia husu atu moris liután iha paixaun, iha ksolok atu bele hatudu beleza saran an totál ba Maromak, nune’e bele sai promosaun vokasionál di’ak liufali atividade eh estratéjia sira promosaun nian ne’ebé ita hala’o.

Durante konferénsia iha mós tenpu ba pergunta, no partisipante ida iha finál hato’o mós espetativa husi membru sira VK nian katak Bispu sira moris tuir liafuan ne’ebé Amu-Papa hakerek iha nia Surat hodi dirije duni ba Bispu sira: “ha’u konvida imi, Bibi-Atan sira Kreda partikulár nian, atu iha atensaun espesiál  atu promove karizma oioin iha imi-nia komunidade sira, sira ne’ebé istóriku nune’e mós karizma foun sira, hodi fó apoiu, anima, tulun iha dixernimentu, hakabesik an ho ternura no domin ba situasaun sira terus no frakeza nian ne’ebé konsagradu/a balu moris, no liuliu haroman ho imi-nia hanorin Maromak nia povu kona-ba valór vida konsagrada nian nune’e halo ninia beleza no santidade nabilan iha Kreda”.

Tuir Prezidente “Conferência dos Superiores Maiores”, Pe. Gabriel Suban SVD, kongregasaun relijioza sira iha Timor-Leste hamutuk 70: kongregasaun feto nian 52; mane nian 15; Sosiedade Vida Apostólika 3. Maibé husi totál ne’e, kongregasaun 19 de’it mak iha estrutura inspetoriál, enkuantu sira seluk sei komunidade ida eh rua ne’ebé hola parte ba inspetoria iha estranjeiru.