Dili/Comoro – Labarik no adolexente 300 husi Infánsia Misionária (la sura animadór/a) ne’ebé irmán FMA sira anima iha sira-nia prezensa iha Kreda lokál sira, halibur hamutuk husi loron 12 to’o loron 14 Outubru 2012, iha “Escola Maria Auxiliadora”, Dili. Sira mai husi Kailako, Fuiloro, Laga, Venilale, Baucau no Dili. Iha sira-nia programa ohin iha konferénsia no serbisu iha grupu, jogus, animasaun, reza hamutuk no haree filme. Aban, loron ikus sira sei halo sira-nia kompromisu ba tinan ida.

Iha konferénsia ohin nian Dom Rodrigo Bilbao (nunsiatura apostólika Timor-Leste) hato’o konferénsia ho tema “Tinan Fiar nian no evanjelizasaun foun”. Nia konvida labarik no adolexente  sira atu “renova fiar no amizade ho Jezús liuhusi sakramentu Eukaristia”.  Atu haklaken Evanjellu ba maluk labarik sira, uluknanai sira tenke koñese di’ak Jezús no haburas relasaun ho Nia liuhusi orasaun.

Nune’e, de’it maka Tinan Fiar nian ida-ne’e be’ebé hahú loron 11 Outubru no remata 24 Novembru 2013 bele sai duni oportunidade grasa nian atu sai misionária ho konviksaun maibe ho domin boot liután ba Jezús Ikusmai nia fó pergunta rua ba labarik sira atu reflete no fahe iha grupu ki’ik: 1) Sé maka Jezús ba ha’u? No 2) Oinsá Infánsia Misionária bele moris Tinan fiar nian?

 

Infánsia Misionária maka Obra ida ne’ebé Kreda universál no lokál promove ho finalidade atu haburas espíritu misionáriu universál labarik no adolexente sira-nian, hodi dezenvolve sira-nia protagonizmu iha solidariedade no iha evanjelizasaun, “tulun labarik sira liuhusi labarik sira”.

Nia karakterístika mak:

• Obra ida: atu distinge husi atividade apostólika tranzitória ida. Ninia organizasaun, nia prezensa iha mundu tomak no esperiénsia tinan 160 resin (harii iha 1843) fó sasin kona-ba ninia efisiénsia
• Misionária: la’ós de’it organizmu ida solidariedade nian ho labarik kiak sira iha misaun atu oferese hahán, hatais, edukasuan no asisténsia sanitária. Maibé misionária tanba eduka labarik sira iha fiar, iha abertura universál. Liuhusi kompromisu batizmu nian sira fahe fiar no soin sira ho labarik hotu mundu nian.
• Pontifísia: Amu-Papa aprova no asume nu’udar Obra evanjelizadora no koloka ba Kreda tomak nia servisu.
• Infánsia: labarik no adolexente maka protagonista hodi dedika an ba labarik hotu rai nian, hodi la haree ba kultura, rasa ka relijiaun.
• Infánsia Misionária nian: labarik sira nia obra ba labarik sira. Sira organiza no forma an atu sai misionária/u di’ak ba evanjelizasaun no fraternidade universál.