Lospalos – ha Domingo loron 08 de Fevereiru 2015 Amu-Bispu Don Basílio do Nascimento fó “Tomada de posse” ba Membru Konsellu Pastorál no Ekonómiku iha parókia Lospalos hahu ho eukaristia santa  ne’ebe Amu-Bispu rasik mak preside hamutuk ho padre Salezianu na’in haat. Selebra Eukaristia ne’e hahú tuku 09.00 dadeer, Sarani barak mak partisipa selebrasaun ne’e.

Molok Amu-Bispu atu fó omilia, membru konsellu pastorál & ekonomiku sira halo sira nia promessa ba Maromak atu moris hodi fó sasin iha  Amu-Bispu, Amu-pároku  no mós iha sarani tomak nia oin hodi  promete katak sei konserva íntegru Doutrina Fiar nian ho fidelidade atu haklaken ba maun-alin sira kona-ba doutrina ne’ebé Santa Igreja hanorin.

Membru sira ne’bé halo promesa hodi lee fórmula promesa nian hodi kaer Bíblia sai nudar fundamentu fiar sarani nian.

Membru sira ne’ebe hola parte ba konsellu pastorál  hamutuk 23 i konsellu Ekonómiku hamutuk na’in 7, husi leigu sira no relijioza Canosiana, FMA  no  ADM.

Molok remata misa Membru sira ne’e hakbesik an ba oin hodi asina sira naran katak sira hori ohin ba oin sai membru konsellu nian hodi tulun Pároku hodi serbisu hamutuk ho Pároku hodi fó tulun ba sarani sira iha parókia Lospalos.

Bainhira misa remata kontinua tan ho diálogu badak ho Amu-Bispu kona “dezafiu sira ne’ebé ohin loron família enfrenta”.

Família sai tópiku importante iha diálogu ne’e tanba haree ba mundu ohin loron família barak mak naksobu tanba lahetan ona domin iha família laran nune’e fasil liu atu fahe malu.

Tan ne’e Amu-Bispu nudar Bibi-atan fó hanoin nafatin ba sarani sira atu kudar fiar sarani ne’ebe kle’an hodi moris tuir valór sarani sira ne’ebé nia fundamentu mak “ Kristu”.