Sidade Vaticano/Kairòs – Amu-Papa Ratzinger fó nia bensan ba kuaze peregrinu 40.000  ne’ebé partisipa iha prosisaun lilin nian horikalan organiza hosi Asaun Katólika Italiana (ACI) no dioseze Roma nian ba tinan 50 abertura Konsíliu Vaticano II. Ida-ne’e nu’udar memória ba prosisaun hanesan halo iha Roma tinan 50 liubá, no iha nia finál Amu-Papa João XXII hakbesik ba janela no fó sai ninia “discorso della luna”.

Prosisaun hahú iha tuku 19.30 hosi Castel Sant’Angelo no to’o iha San Pietro, hotu tiha intervensaun sira, sasin sira no momentu orasaun nian, iha tuku 21 Bento XVI fó nia bensan no agradese ema hotu ne’ebé partesipa.

 

Tuirmai Amu-Papa nia liafuan sira.

 

 

Tinan 50 liubá ha’u mós hamriik iha prasa ne’e ho matan hateke ba janela ne’e, iha-ne’ebé Amu-Papa di’ak beatu João XXII hateke sai no ko’alia liafuan sira haluha-laek, liafuan nakonu ho poezia, bondade, liafuan sai husi fuan. Ita haksolok, ha’u bele dehan nakonu ho entuziazmu.

Konsíliu Ekuméniku boot inaugura tiha no ita seguru katak sei mai primavera foun ba Kreda, Pentekoste foun, prezensa foun maka’as Grasa libertadora Evanjellu nian. Ohin mós ita haksolok, ita lori ksolok iha ita-nia fuan, maibé ha’u bele dehan ksolok natón/sóbria liután, ksolok umilde. Iha tinan 50 ne’e nia laran ita aprendeno esperimenta katak salan orijinál eziste no tradúsba beibeik ho salan pesoál ne’ebé bele nakfilak mós estrutura salan nian. Ita haree katak iha Na’i nia to’os iha nafatin du’ut aat. Ita haree mós katak iha Pedro nia rede iha mós ikan aat. Ita haree frajilidade umana prezente iha mós Kreda laran, katak Kreda nia roo navega hela maski ho anin kontráriu, ho tempestade ne’ebé ameasa roo ne’e. No dalaruma ita hanoin:Na’i iha ne’ebé, nia haluha tiha ona ita! Ne’e maka parte ida esperiénsia nian ita halo iha tinan 50 ne’e. Maibé ita iha mós esperiénsia foun Na’i nia prezensa nian, ninia kbiit nia bondade. Ahi Espíritu Santu nian, ahi Kristu nian,  la’ós ahi ne’ebé han-mohu, lori destruisaun, maibé ahi silensiozu, ahi-oan ki’ik bondade nian, bondade no lialoos ne’ebé nakfilak, fó roman no manas. Ita haree katak: Na’i la haluha ita, ohin mós ninia modu umilde, Na’i prezente no fó manas ba fuan sira, hatudu vida, kria karizma bondade no karidade nian. Sín, Kristu moris, Nia ho ita ohin mós no ita bele haksolok ohin mós tanba ninia bondade la mate, ohin mós nia maka’as nafatin. Ikusliu ha’u hakarak halo ha’u-nian liafuan haluha-laek Papa João XXII nian. Imi bá uma fó re’in ida ba labarik sira no dehan: ida-ne’e Papa nian. Ho ne’e ho fuan tomak ha’u haraik… ha’u-nia bensan.