Dili – Iha loron 11 fulan Outubru 2012, iha Dioseze Dili loke Tinan Fiar nian, hahú ho misa  solene iha loraik ne’ebé Amu-Bispu Alberto Ricardo mak selebra iha Katedrál. Amu-Bispu konvida sarani sira hotu nu’udar Timór-oan buka hametin no haburas ita-nia fiar iha Maromak. Nia dehan: “Husi Maromak nia laran luak ita hotu hetan salvasaun. Ita hotu haka’as-an hodi moris tuir Maromak nia Liafuan ho neon ho laran molok haklaken ba ema seluk. Mundu ohin loron hamrook ba Maromak, barak buka hasees an husi Maromak ho ninia kbiit no haluha ninia vida sarani nian. Tinan ida ne’e nu’udar tinan grasa nian mai ita idaidak. Ita agradese ba Santu-Padre Bento XVI ne’ebé loke Tinan Fiar nian ida-ne’e atu renova no hametin fali ita-nia fiar nu’udar sarani”.

Kona-ba preparasaun ba Tinan Fiar nian iha dioseze Dili, bispu Alberto Ricardo entrega knaar ne’e ba padre David, pároku Remexio nian atu forma komisaun ba Tinan Fiar nian. Bainhira fmatin’org husu nia kona-ba programa ba Tinan Fiar nian iha dioseze, nia hatán katak, nia husu ema ruma ona atu envolve iha ekipa preparasaun maibé sira foin maka formula tema: “Fiar no razaun – fiar no kultura”. Tuir nia, ho knaar 3-4 hatuur iha amlulik ni aleten susar atu bele halo didi’ak empeñu ne’ebé tenke halo. Nune’e nia husu mós husi irmán saleziana sira se bele fó naran ruma atu tulun.

Loron ohin mós, iha dadeer inaugura tiha edifísiu “Câmara Eclesiástica” Dioseze Dili nian. Prezente iha inaugurasaun Vise-prezidente Parlamentu Nasionál Sr. Adérito Hugo no vise-Primeiru Ministru Sr. Fernando Lasama. Padre Apolinário molok ko’a fita haktuir katak depoizde konsulta populár 30 Agostu 1999, durante fuan Setembru Câmara uluk nian hetan sunu totál no Kreda lakon nia arkíviu hotu. Liutiha tina 13 maka foin dioseze bele haksolok ho edifídsiu foun ne’ebé definitivu. Nia mó hateten katak totál orsamentu ba konstrusaun ne’e $ 775.435.017. Husi orsamentu ne’e, $ 700.000 mai husi subvensaun ne’ebé governu liuhusi gabinete Primeiru Ministru no asesoria ba Sosiedade sivíl. Hodi dioseze nia naran, padre Apolinário agradese Parlamentu Nasionál ne’ebé aprova orsamentu no Primeiru Ministru xanana ba subvensuan, nune’e mós nunsiatura apostólika nia ajudu.  Nia mós agradese enjeñeiru no empreza sira ne’ebé envolve iha konstrusaun ne’e.