Dili – Iha loron 5 Fevereiru 2015 Madre Jerál, Yvonne Reungoat FMA, ho konsensu husi Konsellu Jerál nomeia  Ir Alma CASTAGNA  nu’udar Superiora  Inspetoria S . Maria D . Mazzarello” TIN ba tinan neen (2015-2021).

Ir Alma Castagna moris iha Lecco (Italia) iha loron 11 Abríl 1958. Nia hahú nia formasaun ba vida konsagrada saleziana iha tinan 1980 no halo profisaun relijioza dahuluk iha 5 Agostu 1984. Depoizde profisaun dahuluk nia kontinua ninia estudu hodi hasai lisensiatura iha Medisina iha 1986. Aleinde ne’e, nia mós hasai diploma iha Pastorál Juveníl (1988) no Siénsia Relijioza sira (1992).

Sente Maromak nia bolu atu sai misionária, iha fulan Agostu tinan 1992 nia simu mandatu atu sai misionária iha Timor. Ninia knaar dahuluk mak hala’o profisaun médiku nian iha klínika Maria Ausiliadora, Venilale. Iha 1995, bainhira loke komunidade Maria Mazzarello (ETP), nia mak diretora dahuluk komunidade ne’e nian. Husi tinan 1992 to’o tinan 2002, nia nafatin serbisu iha Venilale. Tanba problema saude nian,  iha tinan 2002-2003 nia fila ba Italia atu halo tratamentu ba saude.  Fila fali mai Timor, nia hela iha Venilale, foufoun nu’udar vigária diretora nian no responsavel klínika nian, hafoin nu’udar diretora komunidade nian to’o  2009. Husi 2009-2012 nia simu knaar nu’udar diretora iha komunidade S. Teresa d’Avila iha Baucau. Knaar ikus ne’ebé nia simu molok hetan nomeasaun ba Inspetora mak sekretária inspetoriál no koordenadora pastorál juveníl  FMA nian no membru komunidade S. João Bosco, Dili (2012-2014). Iha fulan Janeiru 2015, Ir Paola Battagliola (eis-provinsiál) husu nia atu hela iha uma Divina Providénsia (Comoro-Dili) atu tulun komunidade ne’e, maibé Maromak iha planu seluk ba nia.

Madre Jerál iha ninia komunikasaun ba Inspetoria TIN  ho data 5 Fevereiru 2015, husu atu FMA hotu adere ba deliberasaun ne’ebé fó sai ona, rezultadu husi babukak ba Maromak nia vontade iha dixernimentu no orasaun husi parte Madre Jerál no ninia Konselleira sira.

FMA TIN agradese Maromak ba nia don ba Inspetoria no agradese Ir Alma Castagna ba ninia “sin” ba vokasaun relijioza konsagrada durante tinan 30 no vokasaun misonária ad gentes ba tinan 22.

Hanesan Madre Jerál husu, hamutuk ita sei halo “dalan fekundu santidade nian iha tinan grasa nian ida-ne’e iha-ne’ebé ita selebra, hamutuk ho konsagradu no konsagrada hotu, bolun ba ninia dixipuladu no, nu’udar Família Saleziana, bisentenáriu Don Bosco nia moris nian” (Surat komunikasaun inspetora foun).

Tuirmai Ir Alma Castagna nia surat ba komunidade sira hotu.

Surat husi neo-provinsial ba komunidade sira (download)