Aman sira nia importánsia iha família
RV – Valór aman nian iha família mak tema katekeze Papa Francisco iha kuarta, 4 Fevereiru 2015, iha Sala Paulo VI. Ne’e etapa daruak ba reflesaun sira kona-ba aman sira, hahú iha semana kotuk bainhira Papa Francisco konsentra kona-ba tema “Perigu aman sira nia auzénsia iha oan sira nia moris”.
Santu Padre fó hanoin katak S. José rasik hetan tentasaun atu soe Maria bainhira deskobre katak nia isin-rua, maibé, ho anju nia intervensaun, nia hela ho nia kaben. Família ida-idak presiza aman ida, Amu-Papa enfatiza.
Atu ko’alia kona-ba valór papél aman nian, PapaFrancisco sita espresaun ruma husi livru Provérbios nian, liafuan sira ne’ebé aman ida dirije ba nia oan no hatudu orgullu aman ida nian bainhira nia konsege hatutan matenek/sabedoria ba nia oan. “Aman ida hatene didi’ak, oinsá susar hatutan liman-rohan ne’e, prosimidade hirak, laran-maus hirak no firmeza”, Amu-Papa Francisco hateten, hodi destaka katak, bainhira oan simu liman-rohan ne’e, aman nia ksolok hakat liu kolen hotu.
“Nesesidade dahuluk mak ida-ne’e: atu aman marka prezensa iha família, besik ba nia kaben atu partilla buat hotu no besik ba oan sira iha sira-nia kreximentu (…) Aman nafatin prezente”. Amu-Papa resalta katak, “prezensa” la’ós hanesan “kontroladór”, basá aman sira ne’ebé kontroladór maka’as hanehan sira-nia oan, la husik sira buras.
Papa Francisco temi mós ai-kanoik Oan ne’ebé lakon, koñese mós nu’udar ai-kanoik aman laran-sadia. Nia destaka aman nia dignidade no ternura hodi hein oan atu fila hikas ba uma. “Aman sira tenke sai pasiente. Dalabarak la iha buat ida atu halo se la’ós hein: harohan no hein”.
Tuir Papa Francisco, aman ida ne’e’bé di’ak hatene hein no perdua husi nia fuan, maibé mós hatene korrije ho firmeza bainhira presiza. No nia hatutan tan katak, lahó Aman Maromak nia grasa, aman sira lakon korajen. Oan sira presiza aman ida ne’ebé hein bainhira sira fila husi situasaun ida insusesu nian.
“Igreja haka’as an atu apoia aman sira nia prezensa iha família sira, basá sira mak protetór fiar nian iha laran-di’ak, iha justisa no iha Maromak nia protesaun, hanesan S. José”.
