Dili – Komunidade Balide, Don Bosco halao formasaun ho tema “ Don Bosco no Eukaristia”, ba labarik no foinsa’e sira iha Oratorio no mos estudante Kristal sira, ne’ebé hahú husi loron 23 to’o 29 ( loron Novena nian); Ho objetivu ida ne’e hakarak atu tulun sira atu konsiente liu tan ba Kristu nia prezensa iha Ostia santa; no ida ne’e Don Bosco rasik kuda iha nia an domin ba Jezús no Nia hakarak kontinua mos ba nia oan doben sira. Durante formasaun halo novena hamutuk ho sira no ikus taka ho Eukaristia.
Hafoin iha dia 30 halo konklusaun ba formasaun ho Misa ba Don Bosco iha Eskola Kristal – Balide, ne’ebé preside husi Pe. Helio Cabral SDB. Iha Misa Padre foti buat tolu ne’ebé Don Bosco uza atu tulun labarik sira, ne’e mak :
1. Don Bosco halo buat hotu ho objetivu atu salva klamar sira
2. Nia uza Sistema preventivu atu eduka sira
3. Ninia edukasaun mak atu lori sira ba to’o iha dalan Santidade nian .
No ida ne’e Don Bosco refere liu – liu ba edukadores sira atu oinsa buka tulun labarik no foinsa’e sira ne’ebé sai nu’udar sira nia destinatariu, la to’o deit atu fo matenek ulun nian ba sira, maibe mos matenek Espiritual no mos moral nian, ida ne’e mak edukasaun Integral ne’ebé Don Bosco nafatin halo no husu ba ita atu kontinua iha ita nia misaun. Hafoin hotu tiha misa kontinua ho aktividades sira seluk hanesan parezentasaun teatro nian, liu husi dansa, kananuk no puisia sira. No ikus liu festa remata iha loron 31 kalan iha Komunidade Balide ne’ebé laos deit ho labarik sira maibe mos ho Vizinho sira ne’ebé pretense iha bairo nia laran, ho festa ne’e ami hakarak atu harii uniaun no espiritu familia ho sira no hamutuk ho sira bele tulun malu iha oan sira nia haburas an; iha festa ne’e halo aprezentasaun badak husi animadores no oratoriano sira kona ba Don Bosco nia moris to’o nia sai Nailulik no hahu loke Oratorio hamutuk ho Bartolomeu Garelli.
Durante preparasaun to’o festa hotu, ema hotu sente haksolok, liu liu ba labarik no foinsa’e sira ne’eb’e rona kona ba Don Bosco nia relasaun ho Maromak no tulun nia oan sira atu kuda mos domin ida ne’e iha sira nia fuan, estudante sira ne’e mos hakarak dezafia sira nia an atu hakaas an atu halo tuir buat hotu ne’ebé sira rona ona durante ne’e kona ba Don Bosco.