RV – Iha katekeze kuar 28 Janeiru 2015, Papa Francisco konsentra iha figura paterna, hodi alerta kona-ba risku auzénsia aman sira nian ba oan sira.

Download
“Figura paterna nia auzénsia iha labarik no joven sira prodús lakuna no kanek sira ne’ebé bele sai grave liu”. Nu’udar ezemplu Amu-Papa temi falta aman nian nu’udar matadalan, prosimidade no domin ba oan sira. Nia rezultadu sei halo joven sira lahó valór, no buka ídolu atu hakonu sira-nia fuan.
Papa Francisco esplika katak liafuan “aman” hatudu relasaun fundamentál, realidade ida antiga hanesan ema nia istória. Ba sarani sira, asume signifikadu espesiál, basá ne’e mak modu Jezús hanorin ba ema atu bolu eh dirije ba Maromak.
Maibé ohin-loron, sosiedade sofre auzénsia aman nian. Tuir Amu-Papa, ne’e mak realidade ida ne’ebé, iha momentu dahuluk, komprende nu’udar libertasaun husi figura “aman patraun”, ne’ebé dalabarak reprezenta aobstákulu ba joven sira nia liberdade.
Autoritarizmu ne’ebé família barak moris eh esprimenta ho figura paterna la’ós atitude di’ak ida. Ohin-loron, problema la’ós “aman-invazór” ida, maibé aman sira ne’ebé konsentra iha an rasik, iha serbisu rasik no iha realizasaun pesoál rasik.
Amu-Papa alerta katak realidade ne’e hamosu joven oan-kiak/órfan sira iha família raisk nia laran, basá aman sira auzente no, maski sira iha uma, sira la hatudu prezensa ba oan sira.
“Dalaruma, parese katak aman la hatene fatin sá loos atu okupa iha família no, iha dúvida laran, nia nonok”, Papa Francisco hateten, hodi esplika katak aman tenke sai maluk ba oan, maibé labele husik atu sai aman.
Papa Francisco konsidera mós responsabilidade paterna ne’ebé komunidade sivíl iha ba joven sira. Nia mós husik joven sira órfan bainhira la fó perspetiva ba sira, ideál sira ne’ebé hamanas fuan, esperansa ne’ebé fó apoiu ba moris loroloron.
Ho katekeze ne’e, Papa Francisco dehan ba sarani sira katak sira keta hela ho impresuan negativa, basá nia konsentra de’it iha problemátika ida, katak aman sira nia auzénsia. Maibé Amu-Papa esplika katak, iha semana oin, sei dedika katekeze ba beleza paternidade nian. “Tanba ne’e mak ha’u hili atu hahú husi nakukun atu to’o ba naroman”.