Baucau – Solenidade Don Bosco nian iha Tinan Bisentenáriu mak oportunidade boot atu hetan grasa wain. Ida-ne’e ita hatene tanba Amu-Papa haraik ona induljénsia iha tempu jubileu ne’e liuhusi Surat asina husi  S. E. R. Mauro Card. PIACENZA: “Atu selebra eventu ksolok ida ne´e ho didi’ak, dedika Tinan Jubileu ba S. João Bosco, aman no mestre ba foin-sa´e sira, funsaun sagradu espesiál no inisiativa espirituál oioin sei hahú husi loron 16 Agostu tinan ida ne´e [2014] to´o 16 Agostu 2015 atu nune´e bele promove devosaun ne´ebe moris ba S. João Bosco iha sarani sira le´et iha Kreda Katólika tomak atu nune´e, ho nia tulun, sira nia hahalok moris nian bele haburas liu tan tuir Evanjellu santu. Atu nune´e sarani fiar na´in sira ne´ebe sei hola parte iha selebrasaun hirak ne´e sei simu rikusoin wa´in husi grasa lalehan nian, sei hetan husi prezente Induljénsia Jubileu nian.
Tanba ne´e,
Iha 8 de Agostu 2014
PENITENCIÁRIA APOSTÓLICA, ho espesial mandatu husi Santu Padre Papa Francisco, ho ksolok haraik Tinan Jubileu ho Induljensia Plenaria recomenda tuir mai ne´e, ho kondisaun hanesan bain-bain halo
( Konfisaun Sakramental, Komuñaun Eukarístiku, no orasaun ba Amo Papa nia intensaun ) bele hetan ba membru Família Salesiana no sarani sira hotu ne´ebe laran moras ba sira nia sala no hala´o hahalok karidade nian. Sira mos bele oferese ba klamar sira ne´ebe sei iha purgatorio, hodi hola parte iha funsaun sagradu sira ne´ebe selebra hodi fo onra ba S. João Bosco, ka bele halo adorasaun ka orasaun ruma iha relikia oin ka iha estatua S. João Bosco nia oin, hodi remata ho orasaun Ami Aman, Kredo, no orasaun ba Nain Feto Maria Auxiliadora no S. João Bosco nian:
I. Iha 31 de Janeiro 2015, Solenidade S. João Bosco, no iha dia 16 de Agostu 2015, loron Bicentenario nian;
II. Tempu ne´ebe sira hola parte iha Peregrinasaun:
a). Ba Kreda ne´ebe konsagra ona ba Maromak no dedika ba S. João Bosco iha Castelnuovo Don Bosco, iha “Colle Don Bosco” (fatin moris Santu nian)
b). Ba Kreda ne´ebe dedika ba Maria Auxiliadora iha Turin no foti nu´udar Basílika Minor iha 1911. S. João Bosco harii konstrusaun ida ne´e; no oras ne´e preserva nia isin sagradu/Urna ka kripta, nu´udar fatin sentru espiritual ba Familia Salesiana tomak….”

Tanba ne’e mak oratorianu sira hotu prepara an hodi iha dispozisaun sira atu simu grasa ne’e hanesan ho:

a) Atitude efetivu hadook an nian husi salan hotu, ida veniál mós, atu hahú moris foun ida.
b) Selebrasaun sakramentu Peniténsia nian, iha loron 30 Janeiru, atu hetan perdaun ba salan sira.
c) Partisipasaun iha Eukaristia, iha loron 31 Janeiru. Momentu ne’e mak tutun enkontru sakramentál ho Kristu, ita-nia dame no rekonsiliasaun.
d) Orasaun ba Amu-Papa nia intensaun, nu’udar sasin komuñaun nian ho Kreda tomak depoizde konfisaun.
e) Hahalok karidade no peniténsia nian ne’ebé esprime konversaun fuan nian mai husi sakramentu sira.