Rádio Vaticano- Sekretáriu Jerál Sínodu Biispu nian, Dom Nikole Eterovic, aprezenta iha sesta, 5 Outubru, iha, Asembleia Jerál Ordinária Sínodu Bispu sira nian. Enkontru hahú domingu ne’e, loron 7, iha Vaticano no remata loron 28 mai. Temátika sentrál maka “Evanjelizasaun foun ba fiar sarani nia tranzmisaun”.

Dom Nikole haktuir katak preparasaun no selebrasaun Asembleia Sinodál ne’e ezije prosesu “kompleksu no ezijente” ne’ebé bele fahe ba aspetu 3 liga metin ba malu: dimensaun espirituál, reflesaun teolójika no pastorál no preparasaun téknika organizativa. Konfere iha kraik konsiderasaun sira kona-ba aspetu ida-idak:

 

1- Dimensaun espirituál
Orasaun maka akompaña no anima atividade sinodál hotu. Ho modu partikulár, Amu-Papa sei prezide selebrasaun litúrjika haat: 7 Outubru, inaugurasaun Sínodu no proklamasaun S. Juan de Ávila no Santa Hildegarda de Bingen nu’udar doutór/a Igreja nian; 11 Outubru Santa Misa inaugurasaun Tinan Fiar; 21 Outubru kanonizasaun beatu Jacques Berthieu, Pedro Calungsod, Giovanni Battista Piamarta, Carmen Sallés no Barangueras, Marianne Cope, Kateri Tekakwitha no Anna Schäffer  no, 28 Outubru, eneserramentu Sínodu nian.

2- Reflesaun teolójika no pastorál
Amu-Papa hili tiha tema ba Sínodu, Sekretaria Jerál Sínodu nian elabora “Lineamenta”, dokumentu reflesaun nian kona-ba argumentu ida-ne’e, ne’ebé publika iha loron 4 Maiu 2011. Kuestionáriu be akompaña “Lineamenta” submete tiha ba organizmu ekeziál sira ne’ebé iha relasaun institutsionál ho Sekretaria Jerál, hodi husu resposta molok 1 Novembru 2011. Resposta ne’ebé hetan to’o 90,5%, katak Kreda partikulár no organizasaun seluk iha duni interese kona-ba tema reflesaun sinodál. Konsellu Ordináriu Dekretaria Jerál analiza resposta sira no halo rezume iha Instrumento Laboris, publika iha loron 19 Juñu 2012.

Dokumentu seluk be iha papél importante iha preparasaun Asembleia Sinodál mak Amu-Papa nia katekeze sira, maib´eliuliu karta apostólika rua ho forma Motu próprio. Oda dahuluk mak “Ubicumque et semper”, 21 Setembru 2012, iha-ne’ebé Amu-Papa kria “Pontifício Conselho para a Promoção da Nova Evangelização” no  “Porta Fidei”, 11 Outubru 2011 nian, hodi proklama Tinan Fiar nian.

3- Preparasaun téknika no organizativa
Aleinde padre sinodál sira ne’ebé Amu-Papa rasik nomeia, padre sinodál seluk Konferénsia Episkopál sira maka hili, Igreja Orientál Católica sui iuris – se bispu sira liu númeru 25– nune’e mós Uniaun Sureriór Jerál sira ne’ebé iha direitu atu hili membru 10.

4 – Partisipasaun iha Asembleia Sinodál
Iha Asembleia-da13 Ordinária Bispu sira nian sei partisipa padre sinodál na’in 262, númeru aas liu iha istória Sínodu nian. Husi Europa na’in 103, Amérika na’in 63, na’in 50 husi Áfrika, na’in 39 husi Ázia no na’in 7 husi Oseania. Maioria padre sinodál sira, na’in 182, nia eleisaun hala’o nune’e: na’in 172 hus Konferénsia Espiskopál sira no na’in 10 husi Uniaun Superiór Jerál sira; na’in 3 Igreja Orientál Katólika sui iuris maka nomeia, na’in 37 partisipa “ex ofício” no na’in 40 Amu-Papa maka nomeia. Iha peritu na’in 45, ouvinte na’in 49 , reprezentante Kreda no komunidade eklezáil be ladauk iha komuñaun totál ho Kreda Katólika, inklui Patriarka Bartolomeu I no primadu Anglikanu, Rowan Douglas Williams no bainaka espesiál na’in tolu: Brother Alois, Taizé, Rev. Lamar Vest, prezidente “American Bible Society and Werner Arber” .

5- Akontesimentu importante sira
Sei iha kongregasaun/asembleia Jerál 23 no sesaun 8 Grupu traballu nian. Iha 8 Outubru, Sekretário Jerál no Relatór Jerál sei lee sira-nia relatóriu sira. Iha sesaun loraik ne’e nian, sei iha diskusaun reprezentante episkopadu kontinente lima nian kona-ba tema Asembleia Sinodál nian. Iha sínteze, sira tenke haktuir oinsá Kreda partikulár sira nia komprensaun kona-ba tema Sínodu nian iha kontinente ida-idak.