Baucau – Iha loron segunda-feira, dia 5/1/2015, Pontifícia Obras Missionárias (POM) Dioseze Baucau nian, halao atividade karidade nian hodi sensibiliza labarik sira atu sai labarik apóstolu ba labarik. Iha atividade ne’e envolve labarik Infánsia misionária sira husi parókia hotu Dioseze Baucau nian. Atividade sira-ne’e atu komemora Loron Mundiál Infánsia Misionária ne’ebé monu iha loron 6 Janeiru no tempu hanesan selebra aniversáriu ordenasaun episkopál D. Basílio do Nascimento, Bispu Dioseze Baucau nian.

Atividade ne’e ho objetivu atu eduka vida misionária iha labarik sira, adolexente no família sira atu ho laran luak lolo liman hodi tulun ema seluk. Kada parókia haruka labarik 15  ho animadór/a na’in rua. Totál labarik no animadó/a sira ne’ebé partisipa hamutuk 231 pessoas no parókia ida-idak mai ho ninia amu pároku.Husi parókia katedrál S. António partisipa labarik na’in 28.

Atividade sira ne’ebé hala’o mak halao asaun karitativa ba defisiente sira. Iha atividade ne’e prezente Sr. Prezidente Repúplika Taur no mós Ministru Saude Sr. Sergio Lobo ho nia ekipa balun husi nasionál  no distritál atu ajuda fó tratamentu gratuita ba ema moras sira liu-liu defisiente sira. Sira mós fo formsaun saude ba labarik sira oinsa atu kuidadu sira nia nihan. Prezente mós Prezidente POM, Pe. Mouzinho.

Iha loraik tuku tolu labarik sira hamutuk ho padre, madre no autoridade lokál sira simu Prezidente Repúblika Sr. Taur iha igreja Vila Nova nia oin, hafoin labarik sira kumprimenta nia ho kananuk Infánsia Misionária nian no poezia. Iha nia lia-menon Prezidente agradese tebes ba igreja ne’ebé halao atividade ne’e hodi envolve labarik sira atu halo asaun karidade nian. Ninia mensajen ba labarik sira dehan katak “loron aban hahú ohin”. Se ohin ita la hahú aban bainrua ita ulun moras. Husu mós inan-aman atu eduka oan sira wainhira sira sei ki’ik hanesan ai-oan se kleuk haloos kedas wainhira sei kiik tanba wainhira boot tos ona.

Iha tuku lima loraik iha mós selebrasaun eukarístika hamutuk ho Bispu Basílio atu agradese Maromak no hanoin fali ninia loron ordenasaun episkopál ba dala 18. Iha nia omilia Amu Basílio husu pároku sira hotu atu hari grupu Infánsia Misionária iha parókia ida-idak nune’e labarik sira bele partisipa iha atividades sira Kreda nian. Remata tiha misa Bispu ho Prezidente fahe simbolikamente prezente ba defisiente sira. Hafoin iha kalan iha mós konvíviu.

Labarik sira hotu partisipa ho entuziasmu atividade sira hotu ne’ebé iha.