Dili – Iha loron 13 de Setembru 2012, foin-sa’e na’in rua husi Mazzarello Bakery, Abelina no Hermínia hetan konvite husi Beechworth Bakery nia boos – Mr Tom Otolle no nia kaben Christine Otolle, atu bá Melbourne, Australia ba semana tolu nia laran ho objetivu halo esperiénsia serbisu nian. Hafoin filafali husi Australia, sira haksolok ho esperiénsia sai ba Rai li’ur no agradese Maromak no ema hotu Mr Otolle, irmán saleziana sira no belun sira, ne’ebé halo posivel esperiénsia ida-ne’e ho gratuidade.

Iha kraik fmatin.org nia entrevista badak ida ba Abelina no Herminia.

Sá ida mak imi aprende husi imi-nia esperiénsia iha Beechworth Bakery?

Iha indústria bakery nian ami aprende kona-ba ekipamentu ho teknolojia avansada, oinsá uza makinaria industriál iha produsaun pastelaria, decorating no paderia; aprende halo reseita ruma hanesan rusty roll, pie botton, christmas puddy, christmas cake, ginger bread, turkish bread, savoryn cones, paun oioin, nst.

Ami hetan akomodasaun iha Mr Tom no Ms Christine Otolle nia uma. Sira iha iha oan na’in haat, feto rua no mane rua. Sira hotu hela ketak. Ami dadeer tuku hitu ba ona fatin serbisu no filafali loraik tuku lima husi loron segunda to’o sábadu. Loron Domingu depoisde misa, ami ba vizita Mr Tom nia bakery neen seluk iha Balarate, Bendigo, Echuca,  Albury, Healesville no Beechworth.

Ms Christine mós hanorin  ami reseita ruma hanesan salada oioin, sopa no verdura oioin no na’an. Nia mós hanorin ami halo pizza, dosi sira hanesan muddy mud cake no chocolate cake.

Oinsá empregadu sira bakery nian simu imi iha sira-nia leet?

Sira laran-luak atu hanorin no fahe sira-nia matenek mai ami, halo ami sente livre no toman lalais sira. Tanba ami badak liu kompara ho sira, sira tau buat ruma aas atu ami hamriik iha leten (sira standar altura malae la hanesan Timor-Leste nian). Sira kontente ho ami tanba, haree ami iha interese maka’as atu aprende no badinas serbisu.

Tuir imi-nia hanoin Mazzarello Bakery bele haburas liután ninia produsaun?

Kona-ba produsaun ita bele halo reseita foun ruma, maibé importante iha ingrediente sira. Kona-ba fatin no makinaria, ita nia ekipamentu labele kompara ho sira. Tanba sira nia sasán modernu liu fali ita-nian.