Baucau – Atu taka tinan 2014, komunidade FMA Baucau halo vijília orasaun remata tinan nian, presede ho retiru loron sorin iha loron 31 Dezembru 2014. Orasaun ne’e atu halo memória no agradese Maromak Tempu nia Na’in, tanba haraik tiha ona mai ita oportunidade ida tan atu hadomi Nia no fó sasin kona-ba Nia; oportunidade ida tan atu koñese Nia di’ak liután. Nia oferese mai ita nia Liafuan, nia mensajen, nia Moris rasik. Nia moris iha ita-nia fuan no oras ne’e boot ba daudaun neineik-neineik, ho ita-nia “Sin”, “sin” ida hanesan Maria nian, ne’ebé loke odamatan sira ita-nia moris nian. Iha oportunidade barak ne’ebé Nia haraik mai ita atu Ninia moris rasik mak buras iha ita.

Orasaun ne’e fahe ba parte haat: momentu husu perdaun no loke an ba MAromak nia laran-sadia, ho renovasaun votus sira; momentu agradesimentu nian ba grasa hotu simu iha tinan 2014; momentu husu bensan husi Na’i ba irmán maluk sira, ba komunidade, ba foin-sa’e sira no ema hotu ita hasoru no presiza tulun; hafoin momentu husu roman husi Na’i hodi halakan lilin sanulu-resin-rua no mós husu ba an rasik “sá loos roman ne’ebé ida-idak hakarak sai ba tinan 2015”. Roman sira-ne’e liga ho fuan Espíritu Santu nian hanesan tuirmai ne’e:

1. Roman DOMIN nian. Ema labele moris lahó domin, ita moris tan domin no atu hadomi. Hadomi katak saran an rasik. Hadomi ezije esforsu, hakribi an rasin no manán an rasik..
2. Roman KOMPRENSAUN nian. Komprende husu atu pratika nafatin pasiénsia. Komprensaun ne’ebé lori ba akollimentu inkondisioná no ba perdaun auténtiku.
3. Roman SERVISU nian. Laran-luak lori ba servisu. Serví ho amabilidade, delikadeza, kordialidade no gratuidade.
4. Roman AUDÁSIA APOSTÓLIKA nian. Audásia apostólika Don Bosco no Madre Mazzarello husik mai ita nu’udar liman-rohan; audásia atu tau empeñu hotu, kriatividade, enerjia atu halo joven sira koñese Jezús Kristu nia domin pesoál ba sira.
5. Roman GRATUIDADE nian. Apresia buat ne’ebé ita simu, hodi haree detalle ki’ik sira mós. Kapasidade atu valoriza pozitivu no deskobre Providénsia nia don sira.
6. Roman KSOLOK nian. Ksolok ne’ebé mai husi fuan ne’ebé hadomi maka’as Na’i no laiha buat ida bele na’ok husi ita. Ita tenke halo nafatin naksira no daet iha ita-nia sorin-sorin sira, basá santidade konsiste iha “haksolok nafatin iha Na’i”.
7. Roman DAME nian. Sai instrumentu dame nian, la’ós sai motivu konflitu nian. Kari dame: “Rahun di’ak ba sira ne’ebé serbisu ba dame basá ema sei hanaran sira Maromak nia oan”.
8. Roman ESPERANSA nian. Maski iha difikuldade ita tenke konfia katak loron sei nabilan hikas. Ita bele hein nafatin ba futuru iha di’ak liu basá Maromak mak gia istória.
9. Roman RESPONSABILIDADE nian. Konstrusaun Reinu nian husu atu ita halo buat hotu posivel ho ita-nia matenek no kbiit hotu.
10. Roman HARAIK-AN nian. Haraik-an katak la’o iha lialoos. Ita hatudu nia liuhusi hahalok sira la hatudu an no foti an nian.
11. Roman FIAR nian. Roman ne’ebé leno ita-nia fuan sira, ne’ebé tulun atu haree realidade hodi Maromak nia matan sira, ne’ebé dudu ita atu buka ninia vontade no hodi realiza, hanesan Maria halo.
12. Roman PERSEVERANSA nian. Ne’e mak segredu boot vitória nian, Se ita konstante ita sei to’o ita-nia dalan nia rohan. Ho ain-hakat ida-idak mak ita sei halo dalan naruk. Bainhira ita labele halo ain-hakat boot, ita halo ki’ik, maibé nafatin halo iha diresaun ba ita-nia rohan katak Jezús Moris-Hi’as.

Iha kalan tuku 8, komunidade kontinua nia TE DEUM ho Eukaristia hamutuk ho sarani parókia santo António Baucau.