Programasaun Inspetoria TIN tinan 2015 no FMA nia agradesimentu ba Ir Paola Battagliola

Dili – FMA sira husi komunidade sanulu-resin-rua iha Timor no Indonesia, halibur iha Dili durante loron 29-30 Dezembru atu halo programasaun  tinan pastorál 2015 no atu agradese Ir Paola Battagliola ne’ebé remata nia serbisu iha rai rua ne’e hodi bá Itália atu hala’o knaar Konselleira Jerál Institutu FMA nian.

Irmán sira konsege elabora programasaun liuhusi ain-hakat sira hanesan identifika dezafiu sira ne’ebé interpela ita-nia an nu’udar FMA iha rai Timor no Indonesia, mudansa ssira mentalidade nian ne’ebé tenke halo no hilin sira atu realiza mudansa sira no to’o ba vizaun Kapítulu Jerál XXIII nian: “Haluan hateken. Misionária sira esperansa no ksolok nian”. Kapítulu husu atu FMA sira nakfilak an liuhusi enkontru, hamutuk ho foin-sa’e sira, sai misionária ksolok no esperansa nian”.

Entre dezafiu sira ne’ebé identifika mak: hamrook ba fiar loos hodi manán dualizmu (sinkretizmu relijiozu) no superfisialidade; komunidade edukativa no komunidade FMA hatudu vizibilidade profétika ho kbiit husi karizma no FMA sira sai misionária kriativa no konstante ho no ba foin-sa’e sira kiak no ki’ik liu. Hafoin irmán sira mós identifika mudansa ruma atu halo hanesan: “husi koñesimentu superfisiál no halai tuir krensa oioin bá halo Maromak nia Liafuan sai kritériu moris nian; husi individualizmu bá enkontru ne’ebé hahoris komuñaun no sinerjia iha Komunidade Edukativa, Família Saleziana, Kreda no sosiedade tuir karizma salezianu; husi ita-nia asaun pastorál rutina nian ba laran-manas apostólika, hamutuk ho joven sira haklaken Kristu to’o iha periferia juveníl ho kriatividade”.

Ba tinan oin irmán sira programa pasu konkretu ruma atu hakle’an Maromak nia Liafuan ho komunidade edukativa, haburas vida orasaun; hamanas fuan oratorianu hodi bá to’o foin-sa’e sira iha periferia no hala’o atividade baibain nian ho kriatividade foun.

Iha kalan 30 Dezembru nian, FMA sira hato’o sira-nia agradesimentu espesiál ba Ir Paola Battagliola, uluknanai ho selebrasaun eukarístika, ne’ebé Pe. Klement Vaclac  SDB prezide hamutuk ho Pe. Apolinário no Pe. Carlos. Hafoin jantár no omenajen gratidaun nian.

Ir Paola iha ninia liafuan agradesimentu hateten katak “oras-ne’e mak tempu atu husik fuan mak ko’alia! Hanesan Maria, ita loke an ba memória gratidaun nian ba buat hotu Espíritu hala’o to’o ohin loron iha ita-nia moris, iha Institutu nia moris iha Timor no Indonesia”.  Nia mós dehan katak “hanoin, halo memória, la’o iha dalan mak abut ba futuru. Hateke ba pasadu la’ós de’it atu hanoin ho nostaljia esperiénsia ida ne’ebé la fila ona, maibé, atu tulun ita projeta ba oin…”

Iha ninia agradesimentu nia temi la’ós de’it irmán sira maibé mós foin-sa’e no labarik sira, razaun ba ita-nia sai FMA. Hafoin nia remata ho liafuan sira foti husi Pe. Pascual Chavez nia liafuan ba selebrasaun tinan 25 prezensa FMA iha Timor: uluknanai, “relasaun ho Maromak: imi buka sai sasin vida ida ho abut iha Nia atu imi bele sai ahi-lakan ne’ebé habiit an husi Ninia Domin no fó roman ba ema hotu ne’ebé hale’u imi, ho atensaun partikulár ba joven sira; daruak, “vida fraternidade nian: imi hanoin katak ida-ne’e don ida Maromak nian, ne’ebé Na’i Jezús revela hodi hateten katak iha-ne’ebé iha fraternidade loos, iha ne’ebá iha Maromak nia prezensa”. Datoluk mak “empeñu atu hadomi imi-nia misaun: imi hadomi imi-nia misaun, saran imi-nia an ho laran-luak”.

Ne’e mós mak entrega husi Kapítulu Jerál XXIII: “ita haluan ita-nia hateken, atu sai misionária sira esperansa no ksolok nian”.