Dili – Tinan-tinan FMA (Filhas de Maria Auxiliadora) sira halo festa família nian iha loron Sagrada Família nian. Tinan ne’e monu iha loron 28 Dezembru no festa ne’e sai mós oportunidade ba família sira atu agradese no despede ho irmán Paola Battagliola, provinsiál FMA ne’ebé atu husik ona Timor-Leste ba kargu foun iha Roma.

Selebrasaun hahú ho Eukaristia, prezide husi Pe. Agostinho Soares SDB. Iha ninia omilia komenta festa ohin nian, ezorta família sira atu fó fatin ba Maromak, basá hodi tau Maromak iha sentru família nian  mak ita hetan ksolok. Hafoin nia mós husu atu inan-aman sira haburas relasaun di’ak ba malu iha família laran, tau matan ba oan sira. Dalabarak inan-aman sira hateten katak oan sira oras ne’e la rona ona inan-aman. Pergunta hikas ba inan-aman, “sé mak sala”? Nune’e konvite atu aman no inan sira eduka oan sira uluknanai ho ezemplu hafoin akompaña mós ho liafuan, ho korresaun.

Hotu tiha Eukaristia, selebrasaun kontinua ho almosu ne’ebé família sira rasik lori hodi tau hamutuk iha partilla fraterna. Hodi partilla buat hotu natón no até naresin ba ema hotu. Durante almosu, labarik sira no família balun aprezenta sira-nia knananuk, poezia, dansa hodi anima partisipante hotu, hodi mós kumprimenta ba festa Natál no Tinan Foun, nune’e mós dedika ba Ir Paola. FMA sira mós hato’o sira-nia knananuk “Amor de Deus primavera” atu agradese Ir Paola nia saran an nu’udar misionária ne’ebé lori fini karizma salezianu femininu mai Timor.

Ikusmai Ir Paola mós hato’o ninia liafuan agradesimentu hodi dehan katak nia sei “la husik Timor” tanba nia “lori Timor” iha nia fuan no orasaun.

Nia hateten katak “momentu ne’e fó oportunidade atu ita bele esperimenta no habiit ita-nia sentidu hola-parte nu’udar família boot ida, habiit forsa karizma nian ne’ebé liga ita, habiit ksolok hela hamutuk nian”. Ir Paola agradese liuliu ba orasaun ne’ebé sai “rikusoin boot” atu bele hatán ba obediénsia foun ho fiar no laran-metin.

Ir Paola taka nia liafuan sira ho Amu-Papa Francisco nia mensajen ba família sira tinan kotuk nian bainhira nia husu ba família sira, “sá loos sira-nia rikusoin boot liu?” Rikusoin boot liu ba família ida mak domin, domin ne’ebé nia hun mak Maromak.