Dili – Prioridade ba evanjelizasaun mak mensajen ne’ebé irmán Maria del Carmen Canales insiste nafatin iha ninia enkontru sira ho irmán FMA sira husi konsellu provinsiál, animadora komunidade nian, irmán ho votus perpétuu no irmán ho votus temporáneu. Liuliu tanba ita atu tama daudaun ona ba Tinan Fiar nian ú ho abertura Sínodu Bispu sira nian (11 Outubru) ne’ebé sei trata asuntu: “Evanjelizasaun Foun ba Transzmisaun Fiar nian”. Institutu husi  kedas KJ XXII tinan tolu liubá husu atu halo dalan evanjelizasaun no edukasaun. Nune’e oportunidade ne’e bele sai intensivu liután ho Tinan Fiar ne’e.

 

Evanjelizasaun presiza evanjelizadora no evanjelizadór sira no ba sira atensaun formasaun ida kle’an sai prioridade boot. Institutu FMA TIN haksolok no agradese Maromak ba ninia laran-luak hodi kontinua bolu foin-sa’e sira atu tuir nia. Iha novisiadu Comoro, loron 2-Outubru 2012, foin-sa’e aspirante FMA na’in neen: Libánia, Fátima, Onesiana, Josefa, Umbelina, Marta halo sira-nia ain-hakat ba oin iha sira-nia formasaun hodi simu medalla postulantadu nian. Iha tinan ida sira sei hakle’an liután sira-nia koñesimentu kona-ba an rasik no kona-ba Jezús hodi husu ba an rasik se loos duni dalan konsagrasaun saleziana maka Maromak nia projetu ba sira. Formadora sira komunidade Balide nian maka sei akompaña sira iha sira-nia dalan deskoberta nian no hanesan irmán Maria Canales hateten “buka aprende husi irmán sira, sira tinan ruma ona uluk ba imi iha dalan ne’e”. Tempu ne’e mós atu haburas fiar iha Na’i no integra ho hahalok, basá fiar lahó obra fiar ne’e mate (surat Tiago), no nia mós hatutan tan “medalla postulante nian la’ós sinál de’it maibé mós sai konvite ba banati tuir Maria ne’ebé sai dixípula dahuluk Jezús nian” .

 

Iha loron hanesan, irmán Maria del Carmen mós tau fatuk dahuluk ba konstrusaun foun atu halu’an Centro João Paulo II, ne’ebé sei hanaran Paulo VI. Nesesidade materiál hanesan edifísiu sai nu’udar suporte ba obra evanjelizasaun no edukasaun. Konstrusaun ne’e sei sai fatin sasimun nian no enkontru sira nian, nune’e mós fatin ba servisu sekretariadu inspetoria FMA –TIN nian.