Dili- Profisaun perpétua votus kastidade, pobreza no obediénsia maka profisaun solene kompromisu nian halo iha públiku atu tuir Jezús Kristu ho modu radikál. Irmán saleziana nia’in rua ir Maria Sílvia Lopes (husi Lospalos) no ir Suzana Alves dos Santos  (husi Dili), liutiha dalan ida preparasaun tinan 6-9 nia laran sira saran-an ho modu definitivu ba Maromak  iha Kreda liuhusi Institutu Figlie di Maria Ausiliatrice (FMA). Misaun FMA nian maka serví Maromak iha Kreda ho karizma saleziana ba foin-sa’e sira ne’ebé kiak liu. Misa solene ne’e ho konselebrante na’in sia inklui reprezentante nunsiatura apostólika Mons Rodrigo, halo iha parókia Maria Ausiliadora, Comoro, no hafoin konvíviu iha Centro JP II.

Sira nia lema “ Ho Na’i ha’u la kuran buat ida” husi salmu 22/23 (bibi-atan nian)  hakarak hatudu sira nia dalan pesoál atu husik Na’i lori/gia sira nune’e sira mós bele lori foin-sa’e sira mós ba du’ut matak no saran an ba sira hanesan Jezús Bibi-Atan di’ak halo.

Irmán Maria del Carmen Canales ne’ebé hodi Madre Jerál nia naran simu sira, konvida família no sarani hotu ne’ebé sasin profisaun ne’e, tulun sira moris ho radikalidade no autentisidade sira-nia fidelidade ba Maromak.

Iha kraik ne’e ninia liafuan sira agradesimentu nian molok ramata Eukaristia solene.

SELEBRASAUN VOTUS PERPÉTUU IRMÁN NA’IN RUA NIAN

DILI, 2 Outubru 2012

“Iha Madre Jerál irmán Yvonne Reungoat nia naran, ha’u simu tiha ona votus perpétuu irmán na’in rua nian: irmán Sílvia no irmán Suzana. Sira hahú husi loron ohin tama atu hola parte nakonu iha Institutu. Husi ohin sira soi nu’udar finalidade buras iha dalan santidade hamutuk ho irmán no foin-sa’e sira no sai membru ativu no kriativu iha Família ne’ebé sira hola parte bá, katak Institutu FMA.

Durante tempu ida nia laran, nu’udar Konstituisaun husu, sira koñese Institutu didi’ak no halo esperiénsia kona-ba signifikadu saran-an ba Maromak, moris iha komundade no serví iha edukasaun evanjelizadora ba foin-sa’e feto no mane sira. Ohin, sira ho liberdade tomak no konxiente kona-ba buat ne’ebé sira halo, sira konsagra an ba nafatin ba Na’i. Maromak nia fidelidade hela ba nafatin, ita hotu ne’ebé ohin sai sasin ba selebrasaun ida-ne’e tenke tulun sira atu moris iha koerénsia no atu keta relativiza sira nia moris rasik. Se ema ida relijioza, nia tenke hatán ho koerénsia.

Kreda nia prezensa, ne’ebé Administradór Apostóliku Timor-Leste nian reprezenta, irmán sira nia prezensa, Família Saleziana nian, belun sira no foin-sa’e sira nian, tenke sai prezensa ida orasaun no apoiu nian ba fidelidade ida-ne’e.

Hodi Institutu nia naran, ha’u agredese inan-aman no família ba vida sarai ne’ebé imi akompaña husi kedas bainhira sira sei ki’ik. Husi ohin, sira nia família mak Institutu FMA, maski nune’e sei la hamenus sira nia domin ba imi, inan-aman sira, biin-alin sira, maun-alin sira ka família alargada tomak, maibé, sei hadomi imi hodi hatán ba Maromak nia projetu iha sira-nia moris. Sira husu imi apoiu orasaun nian nune’e bele moris sira-nia hola-parte ba Institutu ne’ebé sira profesa no akompaña sira-nia fidelidade iha radikalidade moris nian hanesan sira haklaken ho modu públiku ho votu sira ne’ebé sira ohin halo iha Kreda nia oin, iha Institutu nia oin, iha Família Saleziana nia oin no iha imi, parente no belun sira ne’ebe akompaña nia oin.

Ha’u agradese imi ba imi-nia prezensa no imi bele iha serteza katak FMA iha mundu tomak, besik rihun sanulu-rsein haat, hanoin imi loroloron iha sira-nia orasaun. Maria Ausiliadora no Inan akompaña imi no tulun imi-nia família tomak. Ho fuan tomak, obrigada!”