Dili – Enkontru formativu ikus irmán Maria del Carmen Canales nian halo ho grupu irmán ho votus temporáriu na’in 19 iha komunidade Divina Providénsia. Irmán na’in rua husi sira ne’ebé tuir enkontru, aban sei haklaken sira-nia profisaun perpétua: ir Sílvia no ir Suzana. Irmán na’in tolu la tuir tanba hela iha Indonézia.

Enkontru fahe ba momentu rua. Momentu dahuluk lectio ida kona-ba pasajen Evanjellu Jo 10, 10 ne’ebé sai títulu libru Liña orientadora ba misaun edukativa (LOME): “Atu sira hetan moris no moris ne’ebé naresin” no momentu daruak aprezentasaun modelu pastorál juveníl FMA nian.

 

Lectio “atu sira hetan moris no moris ne’ebé naresin” (Jo 1o, 10)

Iha pasajen Jo 10:10,  Jezús fó hatene sá loos maka núkleu sentrál ninia misaun nian: “fó moris iha abundánsia”. Ninia mensajen mak liafoun-di’ak vida nian. Iha Nia mak foin-sae sira bele hetan resposta ba sira-nia lia-husun kona-ba espetativa sira ne’ebé bele hakonu sira-nia fuan.

Iha esperiénsia saleziana Don Bosco sai bibi-atan ne’ebé fó moris ba bibi sira tuir Jezús ninia ezemplu. Nia halibur sira iha festa no dedika tempu tomak ba sira. Iha semana laran nia ba vizita sira iha serbisu-fatin, fábrika sira. No foin-sa’e sira mós hatán ba nia domin, fó mós sira-nia vida ba Don Bosco. Bainhira nia moras atu mate, sira hotu halo sakrifísiu, reza, promete ba Maromak atu husu sira-nia bibi-atan bele moris. Iha esperiénsia edukativa saleziana iha don resíproku vida nian, no domin maka kondisaun ba don ne’e.

Ba Don Bosco “fó vida ne’ebé naresin”, katak haree ninia joven sira “haksolok iha tempu no iha moris rohan-laek”, plenitude iha umanizasaun . Ba ne’e pastorál juveníl tenke tulun foin-sa’e sira atu elabora sira-nia projetu moris nian iha deskoberta progresiva ezisténsia nian nu’udar don/prezente ne’ebé simu no fó. Ne’e maka knaar komunidade edukativa nian.

 

Modelu pastorál juveníl FMA

Pastorál juveníl saleziana FMA tuir Liña orientadora misaun edukativa nian maka prátika ida ne’ebé tau iha relasaun asaun edukativa no evanjelizasaun. Modelu ne’e oferese ba komunidade edukativa hotu. Objetivu pastorál juveníl FMA: lori joven sira atu halo enkontru ho Jezús Nazaré nian, nune’e primazia ba dimensaun evanjelizadora. Nia fundamentu teolójiku-pastorál maka prinsípiu kristuséntriku Enkarnasaun nian relasiona ho teolojia Trindade nian. Sentru pastorál nian mak ema iha ninia dalan baburas nian, ho predilesaun ba foin-sa’e sira ne’ebé iha situasaun pobreza no perigu laran. Nia forsa karizmátika maka Sistema preventivu ho leitura foun ho perspetiva pedagójika haat: kulturál (razaun); evanjelizadora (relijiaun); sosiál (amorevolezza/amabilidade); komunikativa (amorevolezza/amabilidade).

Empeñu pastorál juveníl iha karakterístika vokasionál no misionária no husu atu elabora itineráriu edukativu, atua tuir mentalidade projetu nian hodi halo pasu graduál, no privilejia métodu esperiénsia nian, grupu nian iha ambiente edukativu ho espíritu família nian nakonu ho ksolok no konfiansa.

Modelu pastorál juveníl maka modelu ida dinámiku nune’e nakloke ba estratéjia foun sira tuir nesesidade no urjénsia sira foin-sa’e sira-nian.