Dili – Movimentu Juveníl Salezianu (MJS) tinan-tinan halo forum ba loron tolu no tinan ne’e iha Comoro (Dili) husi loron 12 to’o 14 Dezembru. Tema jerál tinan nee foti husi estréia 2015: “Hanesan Don Bosco hamutuk ho foin-sa’e sira no ba foin-sa’e sira”. Husi tem ajerál ne’e konsellu MJS identifika sub-tema konkretu ba reflesaun forum nian: “Opsaun fundamentál ba joven sira ohin-loron”.

Molok forum, membru MJS sira halo preparasaun iha lokál (komunidade sira) kona-ba tema konferénsia sira hodi reflete no fahe kona-ba dezafiu sira ne’ebé foin-sa’e sira hasoru no o insá hatán ba dezafiu sira-ne’e. Ezemplu hasoru globalizasaun, influénsia moda oioin, relativizmu morál, krize dixiplina, violénsia oioin… oinsá joven ida (tinan 18-25) bele hametin nia valór fundamentál sira hodi la moris tuir de’it korrente, oinsá distinge valór husi nesesidade, oinsá metin iha ninia identidade kulturál no relijioza..

Partisipante forum sira mai husi Lospalos, Fuiloro, Laga, Quelicai, Venilale, Dili, Baucau, hamutuk ema 270. La marka prezensa mak foin-sa’e sira husi Maliana/Kailako. Loron ikus, 14 Dezembru nian, haree tan aumentu foin-sa’e balun ne’ebé hetan oportunidade atu halibur ho sira-nia maluk sira atu ofisialmente loke selebrasaun Bisentenáriu Don Bosco nia moris ba MJS ho Eukaristia no jogu indoor ruma.

Tuir Ir Alice Filipe, iha loron sábadu 13 mai palestrante na’in rua aprezenta sira-nia palestra kona-ba tema “Opsaun fundamentál ba joven sira ohin-loron” husi pontidevista sosiedade sivíl ho señor Leogivildo Ornai (Comissão Naciocal Juventude Timor-Leste) no husi pontudevista salezianu ho Pe. Virgilio da Silva SDB. Loloos iha mós D. Basílio di Nascimento nia naran atu ko’alia tema ne’e husi pontudevista Kreda nian, maibé la konsege marka prezensa. Palestrante na’in rua ne’e hotu husu foin-sa’e sira atu prepara an ba futuru atu sai produtivu. Leovigildo husu atu foin-sa’e sira prepara an la’ós de’it iha nivel materiál, maibé mós psikolójiku no espirituál. Pe. Virgilio hateten ba joven sira katak “períodu foin-sa’e mak xave ida iha ita-nia moris tanba iha períodu ida-ne’e mak foin-sa’e sira deskobre kona-ba ninia an no ninia mehi, hahú organiza an hodi foti desizaun ba ninia an”. Nune’e nia fó karakterístika joven ida nian tuir Don Bosco nia hanorin: “foin-sa’e ne’ebé hatene obedese; foin-sa’e ne’ebé hatene dixiplina; foin-sa’e ne’ebé hatene hadomi devér; foin-sa’e ne’ebé hatene deskobre ninia fiar; hateke ba buat hotu ho matam otimista, espíritu kriativu no fiar iha an rasik”.

Molok foin-sa’e sira fahe malu, ida-idak fila ba nia fatin, sira harohan hamutuk orasaun ba Don Bosco ne’ebé tradús husi orijinál italianu (autór: Pe. Pascual Chávez). Tinan 2015 forum MJS sei hala’o iha Fuiloro