Dili – Kapítulu Jerál XXIII (22 Setembru – 15 Novembru 2014) remata ona, ho ninia surpreza no buat foun sira, nune’e mós kontinuidade ho dalan anteriór. Oras-ne’e mak momentu atu ba partisipante Kapítulu nian atu tranzmite ba irmán sira iha Inspetoria. Nune’e mak husi loron 10-11 Dezembru, iha Dili, realiza tranzmisaun ba konselleira inspetoriál no diretora sira. Konteúdu tranzmisaun nian liuliu foka ba Madre Jerál no Konselleira sira nia relatóriu 2008-2014; metodolojia serbisu nian iha Kapítulu; loron kapitulár ho Komunidade Edukativa (leigu/a no joven sira) hasoru malu; modifikasaun Konstituisaun no Regulamentu nian no sínteze kona-ba dokumentu kapitulár XXIII.

Depoizde hato’o relatóriu tinan 2008-2014, irmán sira fahe iha grupu rua sira-nia surpreza, sira-nia preokupasaun, sira-nia esperansa no dezafiu sira ne’ebé mosu.

Entre surpreza sira ne’ebé irmán sira fahe mak, haree Madre Jerál nia espíritu atu anima Institutu hodi konsege vizita Inspetoria 60; akompaña Konferénsia insterinspetoriál sira, ninia kapasidade atu rona. Surpreza kona-ba estatístika bainhira haree FMA sai husi kongregasaun maski iha menus duké tinan-neen uluk, vokasaun ne’ebé aumenta/ buras, maski númeru tuun, no ida-ne’e fó esperansa

Tan ne’e ita iha esperansa ba futuru katak Institutu kontinua buras liuliu ho aumentu komunidade, númeru novisa aas iha Ázia no iha Áfrika, maski iha kontinente seluk menua. Esperansa mós atu rona katak iha irmán barak mak moris ho radikalidade sira-nia vokasaun no haluha an rasik. Esperansa mós atu haree númeru oratóriu no sentru-juveníl aumenta, entuziazmu misionáriu aumenta, irmán sira la tama de’it iha persiferia foun sira hanesan obra ba imigrante sira maibé mós tama iha ne’ebé iha desizaun polítika, hanesan prezensa “Instituto Internazionale Maria Ausiliatrice” iha ONU (Genevre) fatin deside polítika mundu nian.

Preokupasaun ruma ne’ebé sai mós dezafiu irmán sira evidensia mak dezvalorizasaun kolókiu nian; iha inspetoria balun riku liu no balun kiak liu, no inspetoria barak la fó “versamento” ba sentru; preokupasaun klima komunidade nian, kona-ba espíritu família, relasaun irmán entre irmán; koerénsia moris nian no autoformasaun; dezafiu halo serbisu ho leigu sira, la’ós de’it kolabora maibé korresponsabiliza. Preokupasaun no dezafiu sira haktuir loloos iha pergunta ida ne’ebé kapitulár sira reflete: “tan sá ho formasaun barak maibé moris la muda”. FMA barak mak la moris radikál liután iha sira-nia konsagrasaun no misaun?

Molok aprezenta modifikasaun sira ba artigu balun Konstituisaun no Regulamentu nian, irmán sira simu sínteze eskemátika ida dokumentu finál Kapítulu Jerál 23 nian ne’ebé nia títulu mak “Haluan hateken. Ho foin-sa’e sira, misionária ksolok no esperansa nian”. Íkone bíbliku nu’udar background mak “Emaus”. Dokumentu fahe ba parte lima ne’ebé haktuir narrasaun esperiénsia kapitulár; haktuir saida mak Maromak husu ita liuhusi situasaun atuál; identifikasaun dalan konversaun ne’ebé presiza halo no hilin sira. Núkleu sentrál ba ita-nia hilin mak “Nakfilak an luhusi Enkontru, hamutuk ho foin-sa’e sira, ita sai misionária ksolok no esperansa nian”.