Baucau -MJS nia loron ikus no tutun selebrasaun nian marka ho prezensa foin-sa’e sira husi uma SDB no FMA nian iha Timor-Leste tomak hamutuk liu rihun ida, inklui prezensa foun liu, Maliana. Iha ajenda ohin nian aleinde hahú ho konferénsia ida husi padre Ilídio Correia, Irmán Maria del Carmen FMA mós fó rekoñesimentu ba animadór no animadora sira ne’ebé servisu iha MJS husi tinan 5 ba leten. Entre sira ne’ebé servisu kle’ur liu mak Carlito husi Baucau durante tinan 16 no Martinha husi Lospalos ne’ebé sai animadora ba tinan 13. Hafoin fó premiasaun ba grupu sira ne’ebé manán konkursu teatru kona-ba Memória Oratóriu S. Francisco de Sales nian, inisiativa MJS nian ba tinan dahuluk preparasaun nian ba bisentenáriu Don Bosco nia moris nian. Grupu ne’ebé manán mak husi komunidade SDB Comoro.

Iha loron ikus iha mós oportunidade ba konfisaun molok Eukaristia, ne’ebé maski hala’o iha loron manas boot nia okos, maibé nakonu ho devosaun. Grupu ne’ebé kanta mak koru husi Esternatu Santu Antonio Baucau, ho knananuk no lian furak. Hotu tiha almosu, ida-idak fila ba ninia komunidade habiit ho laran-manas atu hahú Tinan Fiar nian no hateke ba tinan oin ne’ebé ho fatin hasoru malu nian iha Maliana, ba forum MJS 2013.

Iha konferénsia ho tema “Foin-sa’e sira-nia kontribuisaun ba Kreda iha Tinan Fiar nian” padre Ilídio unifika Amu-Papa nia surat Porta Fidei ho Espiritualidade Juveníl saleziana: relasaun ho Maromak, ho an rasik no ho maluk sira. Kona-ba relasaun ho Maromak, nia konvida foin-sa’e sira atu hakle’an didi’ak fiar nu’udar Maromak nia prezente ne’ebé saran ba ema hodi Jezús nia enkarnasaun. “Fiar maka enkontru ho Jezús no buka haree fatin enkontru nian ne’e iha-ne’ebé: eukaristia, iha Bíblia, orasaun”.  Konvite boot atu moris ho autentisidade, liuliu atu la kahur fiar hanesan budu: tau sukaer, tau sarmalé…ezemplu iha inaugurasaun bolu padre atu bensan, hafoin bolu mós lia-na’in atu lees mós manu no hikis raan…”

Kona-ba an rasik padre Ilídio haktuir Amu-Papa nia konvite  iha Porta fidei atu fó sasin kona-ba fiar. Nune’e ba an rasik presiza hakle’an fiar iha Tinan Fiar nian atu bele fó sasin didi’ak. Buka atu haree saida mak favorese ka impata atu fó sasin di’ak. Aprende husi ema ne’ebé fó sasin kona-ba fiar, no buka fó razaun ba ita-nia fiar”. Fiar sai maka’as liután se sei liu husi prova sira eh difikuldade sira. Amu-Papa dehan katak, santu sira mós liuhusi prova oioin, nakukun sira, maibé sira ne’e maka sei hafoun motivasaun sira fiar nian.

Iha relasaun ho ema seluk, Amu-Papa hateten katak ema sarani hotu, foin-sa’e fiar-na’in sira simu mandatu iha Tinan Fiar nian ba evanjelizasaun foun. Atu bele halo evanjelizasaun ne’e presiza uza meiu hotu ne’ebé di’ak no foun, presiza formasaun di’ak, karidade, moris iha komuñaun. Presiza sai sasin kredivel ho obra sira, katak intensifika karidade. Fiar la ho karidade, fiar ne’e folin-laek.

Husi redasaun fó boa viajen ba foin-sa’e sira, kontinua imi-nia dalan no sai sasin hodi haklaken fiar iha Kristu ho konviksaun.