Dili – Husi loron 5 to’o loron 10 Dezembru Inspetoria FMA Timor-Indonesia moris momentu dixernimentu nian ba nomeasaun Inspetora foun, basá Inspetora atuál, Ir Paola Battagliola, iha loron 29 Outubru 2014, durante Kapítulu Jerál XXIII, eleita ba Konselleira Vizitadora. Dixernimentu ne’e ho finalidade konsultivu, katak, tulun Madre Jerál atu halo dixernimentu iha nomeasaun Inspetora foun.  Ir Lucy Rose Ozhukayil, Konselleira Vizitadora mak gia prosesu dixernimentu ne’e, fahe ba grupu 3 keta-ketak: Timor-Leste grupu rua no Jakarta-Indonesia grupu ida (loron 10 Dezembru).

Dixernimentu halo iha klima orasaun nian, iha partilla, no hodi hateke ba dezafiu sira Inspetoria Timor-Indonesia hasoru. Nune’e iha momentu dahuluk, depoizde introdusaun, Ir Lucy Rose husu ba irmán ida-idak atu sai konxiente kona-ba realidade inspetoria nian: “Haree ba realidade ita-nia Inspetoria nian, ohin, no hateke ba futuru saida mak nesesidade boot liu ne’ebé sadik ita-nia Inspetoria?”

Husi partilla mosu dezafiu lubuk ida hanesan n.e. radikalidade iha vida konsagrada, autentisidade nno koerénsia moris nian, mentalidade evanjélika, sasin kredivel, autoformasaun (bíbliku, teolójiku, kuturál, karizmátiku…), hakle’an abut karizmátiku, sai ba periferia, karidade ba malu iha lialoos, formasaun fiar nian ba joven sira, nst.

Iha momentu daruak, irmán sira hodi tau iha konsiderasaun dezafiu sira, buka atu identifika karakterístika eh kualidade ne’ebé Inspetora foun tenke iha atu hatán ba nesesidade sira. Husi partilla irmán sira identifika kualidade sira hanesan vida interiór kle’an, kapasidade atu tau hamutuk ezijénsia no laran-di’ak (fuan inan nian), kapasidade relasaun interpesoál, domin ba Kreda no Institutu, kapasidade iha animasaun no governu, leader ne’ebé sai gia espirituál, sensibilidade pastorál, iha audásia karizmátika no anima iha espíritu Sistema Preventivu, hadomi kultura Timor nian, atensaun ba formasaun, nst.

Depoizde partilla, irmán sira dedika tempu ba orasaun no adorasaun hodi husu husu Maromak atu inspira sira nune’e bele ho responsabilidade hili ema ne’ebé tuir sira bele gia Inspetoria ba tinan neen mai (2015-2021).

Iha Institutu FMA tomak iha Inspetoria 27 mak iha tinan 2015 tenke troka Inspetora tan remata tinan neen servisu nian, tan ne’e  halo prosesu dixernimentu gia husi Konselleira sira.