Roma – Selebrasaun Bisentenáriu Don Bosco nia moris nian hahú ho preparasaun durante tinan tolu (2011-2013) no tinan 2014-2015 mak tinan selebrasaun nian. Entre atividade sira ne’ebé programa iha nivel internasionál, ida mak Kongresu Internasionál Istória Saleziana ho tema “Dezenvolvimentu karizma Don Bosco nian to’o iha metade sékulu XX”. Kongresu ne’e hahú ohin 19 no sei remata 23 Novembru ho partisipante liu atus rua husi mundu tomak. Kongresu ne’e la’o tuir tema preparasaun tinan tolu nian hodi haree Don Bosco nia obra, pedagojia no espiritualidade buras iha istória, hanesan nia rasik dehan: “Ha’u  halo ezbosu…imi tau kór” (MB XI 309).

Pe. Francesco Cereda, Vigáriu Jerál iha ninia boas-vindas hateten katak kongresu ne’e mak rezultadu “hanoin no projeta hamutuk iha ninia totalidade no iha korresponsabilidade no partilla tomak entre SDB no  FMA” durante tinan rua nia laran. Liuhusi impulsu no orientasaun mai husi Reitor-Mor eméritu Pe. Pascual Chavez no Madre Yvonne Reungoat kontituti tiha grupu tolu estudu no serbisu nian ne’ebé soi nu’udar área tmátika “istória obra saleziana, istória pedagojia salezian, istória espiritualidade saleziana”.

Finalidade Kongresu nian tuir Ir Grazia Loparco FMA, prezidente ACSSA (Associazione Cultori di Storia Salesiana) mak buka hatán ba pergunta “oinsá mak karizma salezianu dezenvolve”, hodi uza metodolojia istóriografia nian, katak atualidade interroga passadu atu haree oinsá karizma iha nia orijen adkire ninia diresaun ohin nian.

Depoizde aprezentasaun ohin loraik nina husi Pe. Frencesco Motto, Pe. Prelezzo no Pe. Girauldi kona-ba Epistoláriu krítiku Don Bosco nian no volume Fonti Salesiani ne’ebé foin publika, itineráriu Kongresu nian sei dezenvolve ho vizaun panorámika kona-ba realidade atuál kongreagasaun rua ne’ebé Don Bosco funda (SDB no FMA), hafoin hakle’an espíritu edukativu asaun salezian entre joven sira, no iha loron datoluk dedika ba Don Bosco no ninia maktuir sira nia espiritualidade, motivazaun no orizonte, oinsá “espíritu salezianu” habelar iha fidelidade ba espíritu Don Bosco nian.

Hotu tiha Vépspera, Reitor-Mor, Pe. Ángel Fernández Artime iha “Buona Notte”, depoizde agradese ba partisipasaun husi SDB no FMA barak ne’ebé supoin fó importánsia ba Kongresu ne’e, nia fó dezafiu ida: “Dezafiu tranzmisaun nian ba Inspetoria rasik, Instituisaun rasik, kona-ba buat ne’ebé moris iha ne’e, hanoin no reflete, kona-ba buat ne’ebe sei oferese nu’udar hateken ba pasadu no projesaun ba futuru”. Nia salienta katak husi parte hotu mundu nian mai eko katak asembleia sira, enkontru sira la ih ainsidénsia iha lokál. Nune’e konvite atu “buat ne’ebé moris iha ne’e fó fuan animasaun no identidade karizmátika nian”.

Tuir Reitor-Mor, maski reflesaun iha loron hirak ne’e foka liu momentu kreximentu no espansaun Kongregasaun SDB no FMA nian, ita hatene katak ohin loron “laiha momentu espansaun maibé diminuisaun; la’ós momentu triunfu no forsa nian, maibé momentu haraik-an no rekoñesimentu frakeza rasik”.

Maski nune’e Pe. Ángel  hateten katak “hasoru realidade ne’e, iha ita-nia oin ita iha dezafiu furak futuru nian, ho modu partikulár signifikativu iha tinan Bisentenáriu Don Bosco nia moris nian, atu tau sementu ba faze foun ita-nia Istória Saleziana. Faze foun ida iha ne’ebé radikalidade evanjélika ita-nia moris nian, opsaun evanjelizasaun foin-sa’e no jerasaun foun nian, eforsu atu habiit ema hotu ne’ebé partisipa karizma furak ne’e nia identidade saleziana, la’o ba oin hodi apaixona ba Don Bosco to’o sai sasin ho entuziazmu ohin, halo nabilan liután, ita-nia identidade karizmátika, ekleziál no dixipuladu Na’i Jezús nian”.