Baucau – Animadór Movimentu Juveníl Salezianu husi provínsia FMA TIN No SDB ITM halibur iha Baucau atu halo sira nia forum anuál. Enkontru ne’e atu hakle’an fali Movimentu ne’e ninia identidade no misaun durante loron 2 ho balun nia laran. Iha oportunidade ida-ne’e, irmán Maria Carmen Canales, fó “bondia” ba sira ohin no mós dada-lia uitoan ho sira. Hotu tiha ninia lia-fuan sira, iha oportunidade halo pergunta ruma, foin-sa’e sira husu kona-ba ba sá loos gia espirituál, métodu sá maka di’ak atu dada foin-sa’e sira no oinsá progresu MJS iha mundu.

Ba pergunta sira ne’e irmán Maria hatan katak gia espirituál importante liu atu haburas moris sarani no enkontru ho Jezús ne’ebé kle’an hodi ema seluk nia tulun, Nia dehan ba sira katak FMA no SDB sira nia knaar mak ida-ne’e…nune’e mós leigu adultu ne’ebé halo dalan no esperiénsia kle’an ho Jezús. Nia konvida atu ezije ida-ne’e husi FMA no SDB sira. Ba pergunta kona-ba métodu, nia hatán katak, presiza iha projetu klaru kona-ba oratóriu ka grupu. Sé labarik sira ka foin-sa’e sira mai oratóriu no la muda nia vida ne’e sinál katakbuat ruma la loos. Kona-ba progresu MJS iha mundu, ir Maria hateten katak husi JMJ iha Madrid FMA/SDB sira foti rezolusaun atu haburas liután MJS, liuliu iha fatinsira be ladauk iha.

 

Ba ninia liafuan sira “bondia” nian bele haree tuirmai ne’e:

 

“Ha’u-nia joven doben sira,

Movimetnu Juveníl Salezianu maka fatin iha ne’ebé foin-sa’e sira, salezianu no FMA sira no membru seluk tan Família Saleziana nian bele hasoru malu, hala’o hamutuk esperiénsia oioin hodi halo moris no atua karizma salezianu iha kontestu oioin. Rikusoin Família Saleziana nian, ninia misaun komún nia espresaun maka edukasaun no evanjelizasaun foin-sa’e sira-nian.

Elementu sira identidade nian: espiritualidade juveníl saleziana; Sistema Preventivu; komunikasaun entre grupu sira.

MJS iha karakterístika: edukativu: tanba foin-sa’e no adultu sira eduka an no forma an hamutuk, hetan bee-matan iha espiritualidade, no tuir valór fundamentál ruma atu hala’o iha moris loroloron; juveníl: tanba nia estilu, modalidade animasaun no envolvimentu nian no tanba sira ne’ebé forma Movimentu maka foin-sa’e sira; mundiál: katak sinál komuñaun nian entre povu no kultur sira.

Iha MJS iha Grupu oioin ho dalan formativu ida, hotu-hotu hateke ba Don Bosco no Madre Mazzarello nu’udar modelu, moris tuir espiritualidade saleziana, promove komunikasaun no koordenasaun, maibé lahanesan tuir foin-sa’e feto no mane sira nia presiza.

Movimentu karakteiza mós ho konstante ruma:

–          Grupu sira rekoñese an ho espiritualidade ida no prátika ida ne’ebé karakteriza nia;

–          Sentidu hola-parte nian la’ós formál maibé vitál’fatin atu halo foin-sa’e sira sai protagonista no fatin responsabilidade ativa

–          Fatin iha-ne’ebé fiar sai sentru moris nian.

Dalan atu buras maka espiritualidade, komunikasuan no formasaun animadór sira-nian.

Pontu empeñu nian ba MJS:

Iha área espiritualidade nian:

–          Hala’o esperiénsia fiar nian tuir espiritualidade moris loroloron nian;

–          Hamoris fali elementu importante ruma espiritualidade ida-ne’e nian: interioridade, dixernimentu, akompañamentu;

–          Hakle’an no komunika espiritualidade juveníl salezianu ho moris rasik mak knaar fundamentál MJS nian.

Iha área asaun nian:

–          Habiit asaun MJS nian iha ámbitu sosiál-polítiku;

–          Integra fiar ho moris;

–          Hafoun opsaun preferensiál ba kiak sira.

Iha área komuñaun no koordenasaun nian:

–          Haburas MJS nu’udar espresaun empeñu edukativu no misionáriu Família saleziana tomak nian;

–          Fó hatene di’ak liután santu sira Família Saleziana nian;

–          Kolabora di’ak liután ho Kreda no ajénsia edukativa seluk ne’ebé serbisu ba foin-sa’e sira iha ita-nia rain;

–          Hametin MJS ho estrutura ruma komunikasaun no koordenasuan nian.”