Dili – Iha enkontru ohin, irmán sira votus perpetuu ho irmán Maria del Carmen Canales, tau iha sentru tema rua: 1) Hatutan fiu dialogu nian entre jerasaun sira; 2) Dezafiu rua husi KJ XXII: edukasaun no evanjelizasaun.

Tema rua ne’e lori atu hakle’an fali identidade karizmátika no misaun FMA nian. Durante enkontru iha mós diskusaun iha grupu atu hanoin kona-ba preokupasaun boot sira iha nivel komunidade no servisu ba foin-sa’e sira. Pontu diskusaun dezafiu nian lori atu haree sira ne’ebé foin-sa’e sira moris ka enfrenta ohin iha realidade TIN.

Preokupasaun ne’ebé bele dehan importante liu no sai empeñu maka soi fuan oratorianu, ne’ebé signifika konxiénsia kona-ba identidade edukativa, hamutuk ho empeñu atu moris ho modu konstante espíritu da mihi animas nian “iha naran knaar ida obediénsia entrega” (kf Konst. 64). Hamutuk ho konxiénsia ne’e presiza haburas korresponsabilidade iha komunidade ne’ebé mai husi konfiansa ba malu no promove laran-manas no kriatividade iha misaun.

Preokupasaun ne’ebé liga ho servisu ba foin-sa’e sira ne’ebé grupu sira hotu identifika maka oinsá halo foin-sa’e sira sai protagonista no formasaun fiar nian iha família no ba foin-sa’e sira.

Ko’alia kona-ba dezafiu mai  husi foin-sa’e sira, irmán sira haree katak presiza halo formasaun inisiasaun fiar sarani nian ne’ebé orgániku  atu bele moris ho konviksaun fiar ne’e. Aleinde ne’e iha mós preokupasaun kona-ba foin-sa’e barak ne’ebé lakon esperansa ba moris ne’ebé hatudu ho hahalok oho-an ka hakarak oho-an nian. Ba preokupasaun ne’e Kreda presiza hatán hodi kria grupu apoiu ba foin-sa’e sira ho problema no mós fó atensaun ba pastorál família nian.

Dalan evanjelizasaun no edukasaun ne’ebé tinan tolu liubá KJ XXII husu no agora Kreda ho Tinan Fiar nian husu atu haka’as an liután sai resposta ba dezafiu sira iha leten. Maibé, kritériu importante liu mak hametin uluknanai relasaun ho Maromak atu, konstante iha treinu espirituál konversaun nian ba domin ida mesak, atu loos duni bele haklaken Na’i Jezús.

Irmán sira hotu agradese ba naroman simu no impulsu foun atu hakle’an identidade karizmátika loron ba loron, habiit domin ba Jezús Kristu, domin ba Institutu no laran-manas iha saran-an ba foin-sa’e sira iha knaar evanjelizasaun no edukasaun nian. Konserteza presiza reflete kle’an liután kona-ba dezafiu sira, atu nune’e bele fó resposta adekuada ba foin-sa’e sira nia presiza ohin no iha ne’e.

Irmán Maria Carmen Canales remata nia loron ho enkontru ho ekipe pastorál juveníl inspetoria TIN nian no aban sei hakat ba vizita iha Laga, Fuiloro, Venilale no Baucau ho iha-ne’ebé nia sei partisipa iha forum MJS nian.