Roma – Tema ida husi tema barak, ne’ebé iha loron 12 Novembru, FMA Kapitulár sira enfrenta mak “kolókiu”, nu’udar dezafiu ida ne’ebé Inspetoria barak hasoru, hanesan Madre Jerál subliña iha ninia Relatóriu Seséniu nian: “Ami konstata katak kolókiu iha realidade barak, hetan difikuldade atu moris tuir espíritu Konstituisaun sira-nian, maski Irmán sira adverte nu’udar ezijénsia no sente ninia falta. Ita presiza interroga an kona-ba kauza sira difikuldade ne’e nian. Se ita la iha atensaun, ita sei lakon ‘xave-mestra ba edifísiu Kongregasaun nian’ (MB XVII 376) hanesan Don Bosco hateten” (n.204).

Uluknanai, kolókiu mak partilla moris nian, koñesimentu resíproku no konfiansa resíproka, tulun resíproku atu moris misaun iha komunidade, momentu furak família nian. Kolókiu supoin vizaun fiar nian, simu ho fiar irmán ne’ebé anima komunidade, sentidu forte família nian. Presiza prudénsia no segredu, husi parte diretora no irmán rasik nian, basá ne’e enkontru pesoál, la’ós públiku. Kolókiu lori ba halo gia espirituál maibé diferente husi gia espirituál ka akompañamentu psikolójiku… La’ós diálogu naranaran de’it halo iha uma ho diretora iha korridór, iha paseiu, maibé diálogu ida iha Na’i nia prezensa, sakramentál ida, ne’e mak irmán sira evidensia iha partilla iha komisaun balun.

Durante sharing iha komisaun estudu nian, Kapitulár sira evidensia kauza ruma ne’ebé halo atu la valoriza kolókiu: ida mak falta valorizasaun ba kreximentu espirituál pesoál katak falta projetu vida pesoál nune’e ba kolókiu la hatene ko’alia saida; falta fiar no falta konfiansa ba malu; fatór idade diretora nian ne’ebé ki’ik liu irmán no proveniénsia husi rai ida eh rai seluk ne’ebé kria prejuizu; atitude individualizmu nian ne’ebé dehan “ha’u to’o ba ha’u-nia an rasik, loroloron iha Maromak nia Liafuan, Sakramentu sira, nst.

Komisaun sanulu-resin-tolu estudu nian sei aprezenta aban iha asembleia sira-nia reflesaun no sei individua dalan sira ne’ebé tenke halo atu bele valoriza kolókiu pesoál nu’udar «momentu privilejiadu atu habiit komuñaun no deskobre Maromak nia vontade» (Konst. 34).

Ohin mós Irmán neo-misionária na’in sanulu-resin-hitu (husi Filippinas, Vietnam, Thailand, Korea, Congo, Mexico, Slovakia, Polandia) mai kumprimenta Kapitulár sira. Sira hotu mesak Irmán sira ho esperiénsia moris kleur ona no oras-ne’e  temporaniamente hela iha Castel Gandolfo, tanba Casa Generalizia nakonu ho Irmán Kapitulár sira.

Madre Yvonne iha ninia saudasaun ba neo-misionária sira agradese inspetoria no inspetora sira ne’ebé simu vokasaun misionária no misionária ida-idak ne’ebé hatene hakohak Maromak nia bolun no la husik hakoi vokasaun ne’e iha sira-nia fuan: “Sinál ida katak Jezús kontinua bolu ba misaun ad gentes, au fó moris rasik ho radikalidade, sinál karizma kontinua moris… Enkuantu Institutu sai misionária nia sei soi moris… Imi ba povu ida be Na’i hili ba imi, no ba povu ne’e imi sei hadomi, sinál universalidade Kreda nian, elementu importante ida ninia identidade nian”.

Ita seidauk hatene destinasaun tanba sira sei prepara an ho estudu iha Universidade Urbaniana no presiza halo dixernimentu.