Aprende lian Fundadór no Fundadora nian atu atinje ba fonte karizma nian

Roma – Loron 11 Novembru, hahú ho Madre Jerál nia liafuan ho konvite atu sai misionária ksolok no esperansa nian ida-idak pesoalmente no komunitarimente. Nia hateten katak “ohin foin-sa’e sira, ema sira, presiza hasoru ema, komunidade laran-manas ba Maromak atu komunika Liafoun Di’ak. Maibé tenke Liafoun Di’ak duni, hatudu an katak moris Evanjellu. Esperansa no ksolok mai husi fuan ne’ebé  kiak. Ema kiak de’it mak soi esperansa”. Ema ne’ebé dehan ba Maromak “Ita mak ha’u nia rikusoin mesak de’it” mak konfia iha Maromak. Hodi fahe buat uitoan ne’ebé ita soi sei la kuran buat ida, tanba ita simu husi parte seluk. Ita tenke saran moris, tanba soi domin.

Iha nia liafuan sira La Madre mós komenta pasajen Evanjellu Eskolante Emaus nian: “Eskoalnte Emaus nian  moris iha momentu susar, trájiku liu sira-nia ezisténsia nian. Ida-ne’ebé sira tau sira nia esperansa, mate tiha ona. Ba sira ho mate, buat hotu remata ona. La iha tan buat seluk, buat hotu nakukun. Sira hotu nakonu ho deziluzaun to’o la haree tan buat seluk iha sira moris. Iha momentu ida nakukun liu sira-nia moris nian mak Jezús mai hasoru sira. Sira la rekoñese Nia maibé loke sira-nia uma ba Nia”. Abertura loke espasu ba esperansa…sira loke odamatan ba Jezús maibé depois sira labele hela metin iha sira-nia uma…Sira sai lalais atu haklaken sira-nia ksolok. Ida-ne’e mós mak Maria halo iha Vizitasaun.  Papa Francisco fó hanoin katak, “sarani ne’ebé triste la’ós kontajiozu”, labele komunika ksolok, labele  komunika Jezús. “Joven sira labele simu mensajen ida se la mai ho ksolok…ksolok mai husi laran, husi esperiénsia. Ita-nia uma mak uma nakloke ida, lori atu komunika”.

Madre Jerál mós konvida Kapitulár sira atu moris ho intensidade loron ikus sira KJ nian. Loron ikus sira-ne’e dedika ba leitura verbál nian, halo avaliasaun lala’ok sira Kapítulu Jerál nian, verifika kona-ba Regulamentu Kapítulu Jerál nian no importante liu, redije Dokumentu Kapitulár. Dokumentu Kapitulár ne’e mak sei sai matadalan ba Institutu tomak iha tinan neen mai ne’e atu bele lori duni transformasaun no renovasaun vitál ba FMA ida-idak hodi to’o ba objetivu “Sai ho foin-sa’e sira, uma ne’ebé evanjeliza”. Tanba ne’e, Madre Yvonne insiste liu atu koñese lian Fundadór no Fundadora nian, katak italianu, atu atinje diretamente ba fonte karizma nian, ba dokumentu sira Institutu nian. Aleinde ne’e, nia resalta importánsia atu aprende mós lian seluk ne’ebé Institutu baibain uza iha ninia tradusaun hanesan lia-portugés, lia-inglés… di’ak ba Timor-Leste. Nia mós husu atu halo tradusaun didi’ak ba lian nasionál sira hanesan “tetun”, “japonés”… maibé importante liu mak  ho “seriedade aprende lia-italianu”.