Dili – Loron daruak irmán Maria Carmen Canales nia prezensa dedika ba enkontru ho diretora sira no konsellu provinsiál (25-9-2012). Nia kaer Liña orientadora misaun edukativa (LOME) atu hakle’an ho sira tema rua: 1) Ba ha’u entrega tiha don haklaken nian; 2) Dezafiu ida iha animasaun: Núkleu animadór komunidade edukativa nian.

Ba ha’u entrega tiha don haklaken nian

Tema sentrál LOME mak loos duni “Haklaken Jezús Kristu”, no servisu autoridade nian mak servisu ida atu serví irmán sira, foin-sa’e sira, leigu/a sira, serví la’ós ba an rasik maibé tanba domin ba Kristu atu haklaken Jezús Kristu. Hanesan S. Paulo dehan “ha’u haklaken evanjellu karik, ne’e la’ós  atu ha’u bele gaba an, maibé devér ida; no ha’u la haklaken evanjellu karik, susar boot mai ha’u!” ( 1 Cor9, 16), sai FMA la’ós atu gaba an maibé atu sai instrumentu anúnsiu Jezús Kristu nian. Ba Paulo no ninia kolaboradór sira prezente/don haklaken Evanjellu maka don úniku, absolutu no esensiál. Haklaken sai obrigasaun ida tanba domin de’it ba Kristu, la’ós tanba oportunizmu, atu hatudu an, atu ema gaba. Maibé atu haklaken, presiza hateke metin ba Jezús. Paulo dedika tempu barak ba reflesaun, ba orasaun, basá se nia la halo nune’e oinsá nia bele haklaken hanorin kle’an iha teolojia? Nune’e atu haklaken, presiza iha relasaun kle’an ho ida-ne’ebé haruka, ho Liafoun-Di’ak. Ita bele haklaken de’it se ita iha forsa iha ita-nia laran no forsa ne’e mai husi Kristu. “Ita iha ábitu relijiozu, tara krús, maibé ita iha Kristu nia kbiit?” Pergunta ida atu ita reflete.

Atu taka reflesaun dahuluk irmán Maria Carmen Canales foti Paulo VI nia espresaun ida: “Ksolok no alegria Kreda nian mak evanjeliza”.

Dezafiu ida iha animasaun: Núkleu animadór komunidade edukativa nian

Reflesaun daruak ne’e dedika ba komunidade edukativa no núkleu animadór komunidade edukativa nian. Tuir LOME n. 52 “elementu fundamentál atu asegura asaun edukativa ida ne’ebé efikás no atu fó lia-hatán sira ne’ebé konkretu ba jerasaun foin-sa’e sira-nia lia-husu no nesesidade, iha kontestu ida ne’ebé globalizadu no interkulturál ba beibeik, mak komunidade edukativa ida nia prezensa. Iha nia mak bele realiza konverjénsia no kontinuidade iha intervensaun edukativa sira ho modun ne’ebé envolve foin-sa’e feto-raan sira, mane-klosan sira, edukadora sira, edukadór sira no aman-inan sira iha projetu edukasaun sarani nian tuir karizma salezianu nia estilu”. Iha komunidade dukativa nia laran iha núklei animadór kompostu husi komunidade relijioza FMA, aman-inan sira, edukadora sira, edukadór sira no foin-sa’e sarani sira ne’ebé buka atu fó sasin ho sira-nia ezisténsia ba valór sira ne’ebé hetan inspirasaun husi evanjellu.Núkleu ne’e nia finalidade mak 1) promove ambiente ida iha-ne’ebé bele koko estilu moris tuir evanjellu; 2) Kria no habiit kultura vokasionál; 3) Sai komunidade sarani referénsia nian. Membru hotu serbisu iha koresponsabilidade, katak buka hamutuk, planu hamutuk, forma an hamutuk, atu bele hala’o knaar eduka hodi evanjeliza no evanjeliza hodi eduka. Iha empeñu ne’e hotu sira nia misaun fundamentál mak haklaken Kristu.

Dezafiu boot ba Provínsia Tin maka  forma komunidade edukativa no iha komunidade edukativa ne’e kria n”ukleu animadór”.