Mini restaurante 2014 ETP Maria Mazzarello nian
Venilale – Alunu/a terceiro ano depoizde ezame Nasionál ne’ebé hala’o iha loron rua nia laran, hahú husi loron 4 to’o 5 Novembru 2014, kontinua kedas ho ezame prátiku. Ezame prátiku ne’e inklui Técnico-Alimentar no Hotelaria ne’ebé hamutuk aluna/u na’in 30. Iha ezame prátiku ne’e, idak-idak haka’as-an atu halo diak liu tanba sei fo nu’udar valor ba Ezame ida ne’e. Ezemplu hanesan aluna/u Alimentar, sira halo cake, no tein ho reseita oioin tuir buat ne’ebé sira hatene ona. Aluna/u Hotelaria hatudu sira nia kapasidade iha maneira oinsá atu simu ema, forru meja ho modelo oioin, no prepara bebidas.
Ho kriatividade no hakaran boot atu pratika buat ne’ebé sira aprende ona durante tinan tolu nia laran, nune’e iha introdusaun sira hateten nune’e: “ida ne’e mak rezultadu husi ami-nia estudu durante tinan tolu nia laran ne’ebé ami ho hakarak tomak haka’as-an atu aprende la’ós de’it iha parte teoria maibé iha prátika mós”. Sira hateten katak sira fó valór ba jestu ida-idak liuliu iha sira nia espesialista nu’udar Maktein no maneira oinsá atu simu ema iha hotel ou restaurante sira ne’ebé aban bainrua sira sei hala’o servisu bá.
Aluna/u sira fó sasin katak ho profesór/a sira nia tulun mak oras ne’e ami bele realiza “MINI RESTAURANT”, iha ne’ebé konvida mós profesór/a seluk, padre no madre sira atu mai koko buat hotu ne’ebé sira prepara. Ami hein katak buat ne’ebé ami aprende iha ETP-VENILALE ne’e ami sei práktika iha ami-nia família no fatin ne’ebé ami servisu bá. Maibé sira mós husu nafatin suporta atu iha korajen no kontinua buat ne’ebé amisira aprende ona iha Eskola ida ne’e.
