Dili – Provínsia FMA TIN haksolok ho vizita animasaun irmán Maria Carmen canales FMA, konsellleira jerál pastorál juveníl nian husi ohin loron 24 Setembru to’o loron 3 Outubru 2012.  Komunidade sira Dili nian ohin hamutuk ho nia agradese Maromak ba ninia prezensa ho selebrasaun eukarístika ne’ebé mons Rodrigo prezide. Iha nia omelia, mons Rodrigo fó hanoin kona-ba misaun fiar-na’in hotu nian kona-ba misaun evanjelizasaun nian. Maromak nia Liafuan la’ós atu rai de’it mai ita maibé atu haklaken ba ema hotu, hanesan ahi-oan ne’ebé lakan la’ós atu rai iha kama okos, maibé tau iha fatin aas atu haroman nakukun.

Hotu tiha Eukaristia iha jantár fraternizasaun no benvinda husi formande no foin-sa’e sira komunidade Divina Providénsia nian no ikusnian, molok bonoite aprezentasaun kona-ba inspetoria nia realidade. Liafuan ikus bonoite nian, irmán Maria Carmen dehan katak  iha 2004 bainhira nia mai vizita ba dala uluk, nia foin hahú nu’udar konselleira pastorál juveníl. Liutiha tinan barak nia vizita daruak halo nia haree ho matan foun oinsá Institutu buras iha mundu tomak. Iha tinan 25 nia laran fini ki’ik Mornese nian sai boot daudaun no ita agradese Maromak basá nia uza ita atu fini  ida-ne’e sai buras liu. Ida-ne’e sai bolun ida atu moris liután iha autentisidade, iha radikalidade, atu fó resposta ida iha ksolok, nune’e foin-sa’e sira bele deskobre katak ita haksolok, katak ita moris iha saran an totál ba Maromak atu bele saran Maromak ba ema sira, katak ita sente nesesidade atu hasoru Maromak atu bele fó fila Maromak ba foin-sa’e sira. Irmán M.C. Canales hateten katak “iha vizita animasaun pastorál nian iha provínsia ida soi vizaun rua: iha parte ida lori buat ne’ebé Institutu halo nu’udar reflesaun no dalan kriatividade nian atu hatán ba grupu sira ne’ebé ita simu bolun atu bá, foin-sa’e sira ne’ebé kiak liu ne’ebé ema seluk la tau matan ka fó oportunidade atu haburas. Husi parte seluk konfronta buat ne’ebé Institutu propoin ho reflesaun ne’ebé imi halo daudaun atu hatán ba foin-sa’e sira nia nesesidade. No ida-ne’e labele halo iha Roma, maibé iha ne’e, iha Timor-Leste”.

Iha nia vizita ne’e, irmán Maria Carmen Canales sei iha oportunidade atu hasoru grupu oioin iha provínsia husi MJS ne’ebé sei hala’o sira-nia forum anuál to’o irmán sira juniór no perpétua sira. Loron ikus vizita nian, irmán Maria Carmen Canales sei simu votus perpétua irmán Suzana no irmán Silvia nian iha kreda parókia Maria Auxiliadora nian.