Audiénsia ba FMA partisipante Kapítulu Jerál XXIII – Papa Francisco nia diskursu

“Irmán doben sira, la madre Yvonne agradese ba audiénsia maibé lahó ninia insisténsia sei la sia posivel! Ha’u la hatene se Superiora Jerál ne’e hatene governa, ha’u la hatene, ne’e buat ruma imi-nian, maibé ida ne’ebé hatene tuku odamatan, no forte, ne’e sin! Ha’u asegura! Ha’u agradese ita, madre, ba buat ne’ebé Ita dehan. Ha’u mós hakarak sai insistente hodi hanoin ba Patagónia… Ha’u la dehan tan!

Iha loron hirak ne’e imi foka imi-nia atensaun iha tema “Sai ohin ho foin-sa’e sira uma ne’ebé evanjeliza “, ne’ebé koloka di’ak iha kontestu sosiál no ekleziál loron-ohin nian, marka ho forma wain mizéria espirituál no materiál nian. Defaktu ohin ema sofre tanba moris mukit, maibé mós tanba kuran domin no relasaun. Iha kontestu ne’e, imi bele kapta liuliu foin-sa’e sira nia frajilidade ne’ebé imi dedika ho emepñu iha domin, tuir estilu Don Bosco nian no iha Madre Mazzarello nia ain-hakat. Imi hotu simu bolun atu oferese mensajen Evanjellu nian, ne’ebé sintetiza iha Aman laran-sadia nia domin ba ema ida-idak.

Husi imi-nia serbisu emerje orientasaun fundamentál ba relijioza ida-idak no komunidade ida-idak nia moris.

Uluknanai empeñu atu husik perspetiva “sai ba li’ur” gia imi, atu sai hodi la’o ba zona wain fronteira jeográfika no ezistensiál nian, ho atensaun referensiál ba kiak sira no forma oioin ezkluzaun nian. Iha barak liu kona-ba ne’e!

Hafoin konxiénsia kona-ba nesesidade atu atua dalan oportunu mudansa no konversaun pastorál nian, hodi nune’e, nakfilak imi-nia uma sira iha ambiente evanjelizasaun nain, iha-ne’ebé imi envolve liuliu foin-sa’e sira iha imi-nia misaun rasik. Ne’e katak harii klima ida korresponsabilidade nian ne’ebé favorese ema ida-idak nia dalan fiar nian no adezaun pesoál ba Jezús, atu Nia kontinua faxina/dada ema ida-idak. Ho modu ne’e mak forma foin-sa’e sira atu sai ajente evanjelizasaun nian ba foin-sa’e sira seluk.

Ha’u labele la enkoraja imi atu ba oin ho entuziazmu iha liña asaun sira ne’ebé Espíritu Santu sujere ba imi. Loke imi-nia fuan atu simu movimentu interiór sira Maromak nia grasa nian; haluan vizaun, haluan imi-nia hateken atu rekoñese nesesidade auténtiku sira no urjénsia sira sosiedade ida nian no jerasaun ida ne’ebé muda. Iha fatin hotu imi sai sasin profétiku no prezensa edukativa, liuhusi simun inkondisionál ba foin-sa’e sira, hodi enfrenta dezafiu interkulturalidade nian no identifika perkursu sira atu halo sai efikás imi-nia intervensaun apostólika sira iha kontestu ida – juveníl – ne’ebé mundu virtuál no tekonolojia foun hakonu, liuliu ida dijitál.

Atu halo buat sira ne’e hotu presiza tau Kristu iha sentru ezisténsia rasik; presiza husik Maromak nia Liafuan plasma, ilumina, orienta no tahan; presiza habiit espíritu misionáriu ho orasaun perseverante, ho adorasaun, ho buat hanaran “lakon tempu” iha Sakráriu nia oin.

Tempu hanesan, imi simu bolun atu fó sasin kona-ba ideál ida komuñaun fraterna nian entre imi, ho sentimentu sira akollimentu resíproku, aseita limite sira no hodi valoriza ida-idak nia kualidade no don sira, tuir Jezús nia hanorin: «Nune’e mak ema hotu sei hatene katak imi ha’u-nia eskolante sira: se imi iha domin ba malu» (Jo 13,35). Ha’u hakarak repete konsellu ida ne’ebé iha loron hirak ne’e ha’u fó ba grupu seluk relijiozu sira-nian: unidade. Nunka, entre imi nunka bele iha inveja, laran-moras, keta husik buat sira ne’e mosu! No unidade iha uma. Nunka husik terrorizmu perigozu iha vida relijioza: terrorizmu ko’alia aat nian tama tiha ona. Se ó iha buat ruma hasoru irmán ida, bá no hateten iha nia oin. Maibé keta halo terrorizmu ida-ne’e, basá ko’alia aat mak bomba ida ne’ebé ó soe ba komunidade no harahun nia. Unidade lahó terrorizmu ko’alia aat nian.

No unidade ida-ne’e husu – imi hatene didi’ak – dalan sériu ida formasaun nian, ne’ebé komprende atualizasaun mós iha siénsia umana sira ne’ebé bele tulun imi iha imi-nia misaun. Defaktu, imi simu apelu atu rona ho disponibilidade no komprensaun ema hotu ne’ebé bá hasoru imi atu simu apoiu morál no umanu, atu hatene interpreta situasaun sira ne’ebé imi hala’o knaar bá, atu bele inkultura mensajen evanjélika. Ba finalidade ne’e, misaun ad gentes oferese ba imi kampu luan boot ida atu halo imi-nia moris rasik don ida ho domin.

Durante serbisu kapitulár imi la kuran atu reflete kona-ba imi-nia atividade apostólika loroloron nian, ne’ebé halo imi iha kontaktu ho ema sira nia ksolok, espetativa sira no terus sira. Hodi hela iha pátiu ho labarik sira, iha sala ho alunu sira, ho foin-sa’e sira iha sidade reál eh iha “bairru virtuál sira”, iha merkadu ho foin-sa’e feto sira, imi hakbesik ba realidade no problema sira foun ba beibeik ne’ebé interpela imi. Ba ema hotu imi sai misionária sira esperansa no ksolok nian, hodi fó sasin valór sira imi-nia identidade saleziana rasik, espesialmente kategoria enkontru nian, aspetu fundamentál imi-nia karizma nian: nia mak bee-matan ida fresku nafatin no vitál iha-ne’ebé imi bele bá kuru domin ne’ebé revitaliza paixaun ba Maromak no paixaun ba foin-sa’e sira. Difikuldade evita-laek sira, ne’ebé hasoru iha dalan, la  hamenus entuziazmu imi-nia asaun apostólika nian. Liután, tuir ezemplu S. Giovanni Bosco no Santa Domenica Mazzarello dudu imi atu kontribui ho entuziazmu liután ba evanjelizasaun foun ho imi-nia atividade iha ámbitu edukasaun no eskola nian, katekeze no formasaun foin-sa’e sira-nian ba apostoladu.

Irmán doben sira, imi hatene didi’ak oinsá Kreda estima vida konsagrada. Defaktu nia horik iha Komunidade nia sentru no nu’udar elementu desizivu ba ninia misaun, no oferese kontribuisaun espesífiku liuhusi sasin moris ida saran totalmente ba Maromak no ba maun-alin sira. Ida-ne’e mak, ho Maria Santíssima nia tulun, ne’ebé imi venera ho títulu Ausiliadora nian, empeñu ba imi ida-idak no ba imi-nia Kongregasaun tomak! Ho votus ne’e, ho fuan tomak ha’u fó bensan ba imi no ba imi-nia irmán sira Bensan Apostólika. No ha’u husu imi atu harohan mai ha’u, no keta haluha Patagónia! Obrigadu”.