“CONECTIL? Sín, maibé ho oin foun”.

Dili/Comoro – Atu follow-up enkontru kona-ba CONECTIL (Conselho Nacional da Educação Católica em Timor-Leste) iha loron 8 Juñu 2012 (iha Baucau), ohin Konferénsia Superiór Maiór Relijiozu/a sira-nian, konvoka fali enkontru ida iha salaun komunidade saleziana pos-novisiadu iha Comoro-Dili. Partisipante na’in 60 buka hatán ba pergunta ida ne’ebé Amu-Bispu Dom Basílio halo iha tempu ne’ebá kona-ba oinsá Konferénsia Superiór Maiór sira hanoin kona-ba CONECTIL nia knaar. Prezidente Konferénsia Superiór Maiór sira-nian, padre João Paulino SDB formula fali pergunta ne’e hodi husu ba partisipante sira: presiza CONECTIL ka lae? No se presiza razaun sá de’it no se la presiza mós fó razaun sira.

Nune’e, enkontru ne’e atu fahe ideia kona-ba estatutu CONECTIL nian no Memorandum Entendimento entre CONECTIL no Governu ne’ebé halo tiha ona iha loron 19 Abíl 2011.

Husi diskusaun sira, mosu impresaun katak CONECTIL sai fali órgaun ezekutivu edukasaun no la husik autonomia ba fundasaun sira atu hala’o sira-nia knaar tuir rikusoin diversidade no karizma ne’ebé ida-idak iha. Pontu ida dúvida nian mak CONECTIL seidauk iha  estatutu ofisiál, maibé halo tiha ona Memorandum de Entendimento ho Ministério da Educação. Memorandum ne’e mós sai asuntu diskusaun tanba iha artigu ruma define katak CONECTIL sai reprezentante únika edukasaun Katólika rai-laran iha relasaun ho governu (artigu 2, #a). Buat ne’e, bloka atu fundasaun sira bele iha kontaktu diretu ho Governu, enkuantu mós CONECTIL seidauk funsiona  nu’udar estatutu ad esperimentum husu.

Relijiozu/a sira konkorda ezisténsia CONECTIL nian maibé husu atu iha oin foun, natureza foun, basá nia bele sai forsa Kreda Katólika nian iha área edukasaun, hodi hatudu unidade vizaun nian iha área edukasaun tuir prinsípiu no valór sira Kreda nian, nune’e tulun nasaun iha dezenvolvimentu rekursu umanu. Presiza halo foun estatutu atu bele hakohak fundasaun sira hotu relijioza no leigu sira nian, hodi la halakon karákter espesífiku instituisaun ka fundasuan ida-idak nian ho ninia espiritualidade no karizma. Nune’e CONECTIL ba li’ur sai órgaun mediasuan no iha laran sai órgaun koordenasaun forsa sira-nian.

Iha finál diskusaun nian, deside tiha atu Komisaun Edukasaun Konferénsia Superiór Maiór sira nian, ho koordenadór padre Gabriel Suban Koten SDV, atu elabora fali rezultadu sira husi enkontru ne’e atu bele aprezenta ba Bispu sira.