Roma – “Maria simu imi ohin iha Ninia uma nia oan-feto doben sira no nia mak inspiradora ba imi-nia konsagrasaun no haksolok ho imi-nia misaun. Maria tau matan ba imi ho modu konkretu, vizivel, hanesan Don Bosco dehan: Maria horik iha imi-nia uma no assite iha apostoladu no konforta iha difikuldade, hakonu ho grasa imi-nia Institutu”.

Ho liafuan sira-ne’e mak Kardeál Angelo Amato SDB, Prefeitu Kongregasaun Kauza Santu sira-nian hahú ninia omilia ohin iha Eukaristia agradesimentu nian ba eleisaun Madre Jerál no Konselleira sira-nian. Selebrasaun Eukarístika hala’o iha Bazílika Santa Maria Maggiore, dedika ba Na’i-Feto “Salus Popoli Romani”, ne’ebé tuir tradisaun nia data monu iha 5 Agostu, hanesan ho loron fundasaun Institutu FMA nian. Bazílika Santa Maria Maggiore, harii iha foho-oan Esquilino, nia mak Bazílika ida husi Bazílika haat patriarkál Roma nian no nia mesak mak sei konserva estrutura paleokristiana (antigu liu). Tradisaun ida hateten katak Na’i-Feto rasik mak hakarak atu harii Bazílika ne’e no nia mak indika no inspira konstrusaun ninia uma ne’e iha Esquilino. Mosu iha mehi ida ba patrísiu Giovanni no ba Papa Liberio, Na’i-Feto husu atu harii Kreda ho nia naran, iha fatin ida ne’ebé nia rasik sei hatudu. Iha loron 5 Agostu (bailoron), foho Esquilino taka nakonu ho neve, milagre Maria nian, katak loos duni nia hakarak Uma ne’e ba nia.

Monumentu ba Maria iha fatuk, ohin hetan onra husi monumentu moris Agradesimentu nian ba Maria.

Kardeál Angelo Amato, mós husu atu FMA sira ba iha periferia, no FMA sira-nia periferia mak foin-sa’e sira, ba ho enerjia foun atu halo batalla edukativa ne’ebé Kreda entrega mai ita. Nune’e nia enkoraja atu halo batalla ne’e hodi “hatais armadura Maromak nian atu reziste diabu nia babeur sira” (kf Ef 6), atu kombate dominadór sira mundu ne’e nian hanesan “ideolojia aat, lejislasaun anti-evanjélika, projetu sira ne’ebé harahun valór família nian, no hafoer projetu edukasaun ida umana, sarani, integrál”, Amu Angelo destaka.  S. Paulo kontinua ninia ezortasaun atu sai santu, hatais an ho fiar, lialoos, justisa…metin iha orasaun atu Na’i bele kumpre iha ita Ninia knaar. Orasaun indispensavel liu, atu harii personalidade umana no sarani realizada.

“Misaun edukativa implika santifikasaun pesoál – Kardeál Amato dehan – hanesan imi-nia Irmán sira ne’ebé moris ho modu eroiku Evanjellu. […] halo santidade nu’udar instrumentu edukasaun nian ba foin-sa’e sira”. Sira ida deklara ona nu’udar santa (Madre Mazzarello), barak beata, la’ós de’it irmán sira maibé mós aluna sira hanesan Laura Vicuña.

Ikusmai, Kardeál Amato konvida atu lori ba oin kauza kanonizasaun nian, tanba nia nota katak “husi 1951, tinan kanonizasaun Madre Mazzarello nian, la iha tan kanonizasaun foun”. Razaun tanba sá? Tanba falta milagre. Tuir Kard. Amato, ne’e “kestaun ida maturasaun espirituál nian, iha ne’ebé Institutu tomak tenke partisipa”. Presiza akompañamentu komunitáriu, kordiál, atentu, husi irmán hotu mundu nian. Kauza sira la to’o rohan, la’ós tanba Amu-Papa lakohi: la iha milagre! Nune’e, konvite atu koñese “serva sira Maromak nian”,  hodi moris tuir sira, hodi “harohan ba sira” atu liuhusi sira husu “grasa no favór espirituál no temporál” no Na’i sei halo milagre. “Milagre iha, presiza de’it husu”, nia resalta.

 Santidade mak ideál edukativu, no hodi sai edukadora santa de’it mak ita-nia misaun iha fuan.