Roma – Horisehik no ohin, Irmán Kapitulár sira tama iha faze ikus dixernimentu nian atu hili Konselleira Vizitadora sira. Pe. Paredes, ne’ebé gia dixernimentu husu atu Kapitulár sira fó ba Madre Jerál ekipa ida ne’ebé bele kolabora ho nia iha tau-matan ba Institutu, atu bele realiza “mehi boot” ba tinan neen mai ne’e: “imi halo atu sai projetu entuziazmadu iha animasaun misionária no komunitária Institutu nian”.

Iha ninia liafuan sira abertura nian molok dixernimentu nia hateten: “Ohin imi sei hili ‘shaliah’, katak Konselleira sira ne’ebe sei reprezenta Madre Jerál iha ninia vizita kanónika sira, ema sira ne’ebé sei sai estensaun armónika leadership sentrál nian. Sira mak hanesan ligasaun sira isin nian, ne’ebé, artikula iha diversidade, ne’ebé harii korpu kongregasionál”.

Nia repete ideia sira ne’ebé nia aprezenta ona molok  hodi destaka katak presiza hili ema sira ne’ebé “disponivel atu inaugura  etapa foun iha ita-nia moris atu hatán ba dezafiu sira ohin nian ne’ebé rekere resposta foun iha sosiedade ida movimentu nian”.  Ideia seluk mak relasaun entre “leadership” no “followership”: “Bainhira maktuir sira ‘fiar’, ‘konfia’ iha leader sira, leader sira muda, nakfilak an… Ema ne’ebé fiar iha ó, kria ó! Imi tenke hamosu konfiansa iha leadership foun Institutu nian! Nune’e mak sei moris hikas”.

Buat ne’ebé Pe. Paredes fó hanoin ba irmán eleita sira katak sira tenke tau sira nia an la’ós atu serví sira-nia ideia sira, maibé “kontinua prosesu dixernimentu nian” atu la esklui irmán naran de’it”. “Presiza rona lian hotu atu la lakon Maromak nia lian ida”.

Aleinde ideia sira ne’e, husi kedas inísiu, Pe Paredes ezorta atu “akolle ho konfiansa inter-étniku no inter-kulturál”, ne’ebé wain loos iha nsitutu. “Espíritu ko’alia lian hotu. Imi halo atu sai posivel pasajen husi toleránsia multikulturál ba prosesu interkulturál ne’ebé lori imi atu sai Institutu ida trans-kulturál”, nia resalta.

Nune’e, ikusmai ohin, Kapitulár sira konsege kompleta kuadru Konsellu Jerál foun FMA nian ho Konselleira Vizitadora sira: Ir Silvia Bollousa (Uruguay); Ir Marija Pece (Slovenia); Ir Lucy Rose O. (india); Ir Chantal Mukase (Congo); Ir Phyllis Neves (EUA); Ir Paola Battagliola (Italia-misionária iha Timor-Leste); Ir Maria Assunta Inoue Sumiko (Japaun).

Konselleira Vizitadora ne’ebé la prezente iha Kapítulu mak Ir Phyllis Neves, no atu hetan ninia aseitasaun, Madre Jerál husu liuhusi telefone. No iha konfiansa no fiar nakonu ba Maromak ne’ebé bele halo hotu nia hatán sín.