Roma – Madre Yvonne Reungoat mak Superiora Jerál da-9 Institutu “Figlie di Maria Ausiliatrice”, ho segundu mandatu tinan neen nian.

Eleisaun hahú iha tuku 9.35 (oras Itália), ih aeskrutíniu dahuluk. Ba nia Asembleia Kapitulár fó parabéns ho basa-liman naruk no ida-idak forma hodi ba kumprimenta nia ho jestu simbóliku ida. Ir Paola Battagliola, Inspetora Timor-Indonesia nian  fó parabéns hodi tara tais ida ba nia.

Ir Yvonne Reungoat, tinan 69, moris iha loron 14 Janeiru 1945 iha Plouenan iha Fransa no iha tinan 49 Profisaun Relijioza nian.Nia tama iha Konsellu Jerál tinan 18 liubá no husi tinan 2008 nia sai Superiora Jerál Institutu nian.

Ninia servisu animasaun no governu nian hahú iha 1983 nu’udar Inspetora Figlie di Maria Ausiliatrice Fransa nian. Iha 1990 nia simu nomeasaun nu’udar delegada Inspetori sira España no Fransa nian ba Áfrika Osidentál, kargu ne’ebé permete atu nia koñese parte seluk Institutu nian no, iha tinan hanesan, nia partisipa iha Kapítulu Jerál XIX. Iha 1991 nia eleita nu’udar Superiora provínsia Afrikana “Madre di Dio” ho sede iha Lomé (Togo). Durante tinan hirak ne’e nia privilejia relasaun ho irmán sira, atensaun ba foin-sa’e sira, kolaborasaun ho Família Saleziana, formasaun animadór/a sira-nian no domin ba ema sira ne’ebé kiak liu.

Iha Kapítulu Jerál XX (1996) nia simu knaar Konselleira Jerál Vizitadora nian. Iha seséniu ne’e nia vizita no hasoru FMA sira provínsia neen Amérika-Latina nian, Provínsia haat Europa nian, no Korea. Iha tinan  2002 durante Kapítulu Jerál XXI nia simu nomeasaun Vigária Jerál nian. Nia hala’o ho amorevolezza nia knaar hodi akompaña ho modu diretu komunidade sira ne’ebé depende diretamente ba Madre Jerál (Auxilium, Casa Valsé, Casa Canta, Casa Generalizia); ninia  knaar seluk mak koordena programasaun no organizasaun kursu formasaun ba Inspetora foun sira; nia mós favorese kolaborasaun Institutu nian ho”Associazione Cultori di Storia Salesiana (ACSS)”.

Iha 2004 nia vizita komunidade sira Inspetoria  Santa Teresa Madrid (España) nian no iha 2005 Inspetoria Na’i-Feto Áfrika nian iha Repúblika Demokrátika Congo nian.

Durante Kapítulu Jerál XXII 2008 nian, Kapitulár sira hili nian nu’udar Superiora Jerál Institutu Figlie di Maria Ausiliatrice nian. Kapítulu XXIII ida-ne’e (ba Madre Yvonne dala neen ona mak nia partisipa KJ sira), Kapitulár sira hili fali nia ba tinan neen tan. Bainhira Ir Ciriaca Hernández, Kapitulár ho tinan barak liu profisaun relijioza nian husu ba Madre Yvonne se aseita mandatu, nia ho emosaun maka’as hatán: «Ha’u aseita iimi-na konfiansa. Espresaun bíblika tahan ha’u: “Bainhira ha’u fraku mak ha’u sai forte “. Ha’u entrega an tomak ba Maria no ha’u simu ninia konvite: “Halo buat ne’ebé Nia dehan ba imi”».

Auguri Madre!