Roma – Ohin hahú períodu dixernimentu ba eleisaun Madre Jerál no ninia Konsellu. Madre Jerál nia eleisaun sei halo iha loron 24, no loron sira tuirmai, hili Vigária Jerál, Konselleira neen Ámbitu nian no Konselleira  Vizitadora hotu. Dixernimentu sei remata iha loron 29 Outubru.

Iha kinta loron 30 Outubru, Madre no Konsellu foun, hamutuk ho Kapitulár sira, sei halo peregrinasaun ida ba Bazílika Santa Maria Maior. Momentu oportunu ida atu manifesta ba Maria ninia gratidaun, atu konfia parte ikus serbisu kapitulár nian no komunidade  ida-idak atu bele sai “ho foin-sa’e sira uma ne’ebé evanjeliza”. Selebrasaun Eukarísitka sei prezide husi Kardeál Angelo Amato, SDB, nu’udar maneira di’ak liu atu esprime sentimentu no intensaun sira.

P. José Cristo Rey García Paredes, klaretianu españól mak gia dixernimentu. Iha kedas tinan kotuk mak nia fó nia tulun ba Konsellu Jerál iha dalan preparasaun nian ba KJ 23, nune’e mós ba Kapitulár sira nu’udar preparasaun molok abertura Kapítulu nian: gia matenek ida no naroman-na’in iha momentu xave sira preparasaun nian.

Iha omilia, hodi komenta leitura Evanjellu ohin nian, nia hateten katak, ita la’ós na’in ba foin-sa’e sira, irmán sira, leigu sira… ita mak adiminstradora de’it. Hafoin, kontinua ho reflesaun dahuluk iha dadeer fahe ba parte rua: 1) aprezenta Surat “Scrutate” ne’ebé Kongregasaun ba Vida Konsagrada hasai no; 2) aprezentasaun tema “Faze sira dixernimentu nian. Fiat voluntas tua!”. Nia repete dalabarak katak Espíritu Santu mak protagonista loos Kapítulu nian. Nia  deskreve dixernimentu nu’udar momentu sakramentál ida. “Sakramentu sira mak momentu desizivu sira (Karl Rahner)” ne’ebé liga ita ho Kristu nia Mistériu Paskál.  Tempu dixernimentu mak tempu foti desizaun ba veteranu sira nune’e mós ba foun sira..

Buat ne’ebé importante mak dixernimentu espirituál, hodi rona iha silénsiu Maromak nia lian iha ema seluk. Maibé, “ita bele koñese Maromak nia lian ne’ebé subar?… Oinsá hatene Maromak nia vontade ohin?” Espíritu Santu tulun ita-nia frakeza.  Oras-ne’e mak tempu misaun Espíritu Santu nian. Iha momentu desizivu ne’e Nia prezente. Bainhira Espíritu Santu mak protagonista nia la halakon ita, hariku ita ho ninia karizma individuál no komunitária.

Padre Paredes konvida Kapitulár sira atu forma komunidade dixernimentu nian liuhusi momentu rua: orasaun komunitária nu’udar raronak no prosedimentu ospitalidade resíproka bainhira dixerne. Hodi sita John Ackerman atu halo orasaun rona nian presiza “para, haree, rona” (Stop, Look and Listen). Kona-ba ospitalidade resíproka presiza halakon egosentrizmu hotu, prejuizu hotu no liberta an husi ajenda hotu, atu fó fatin ba Espíritu Santu atu ko’alia mai ita. Objetivu  dixernimentu nian mak Fiat voluntas tua! Fiat mihi secundum Spiritum tuum!