Vaticano –  Pontifísiu Konsellu ba Komunikasaun Sosiál no Micromegas Comunicazione realiza filme-dokumentáriu ida kona-ba Konsíliu Vaticano II, ne’ebé prevé atu fahe ba mundu tomak husi loron 11 Outubru  2012, data iha-ne’ebé komemora aniversáriu abertura  Konsíliu Vaticano II no inísiu Tinan Fiar nian.

 

Tinan Fiar nian maka okaziaun atu narra no dokumenta tema boot sira ne’ebé diskute durante Konsíliu Vaticano II no filme-dokumentáriu buka rekonstroi kontestu istóriku, teolójiku, kulturál no emotivu eventu ne’ebé marka ho kle’an Kreda nia istória, aleinde influensia mundu kontemporáneu nia situasaun.

 

Produsaun filme-dokumentáriu Konsíliu Vaticano II realiza filmajen inédita (ladauk publika), grava iha HD, iha estúdiu ida prepara duni ba dokumentáriu ida-ne’e iha Micromegas Studios, Roma ho gravasaun no imajen kona-ba fatin sira signifikativu liu sidade Vaticano nian, n’e: Arkivu Segredu, Biblioteka Apostólika, Bazílika S. Pedro, Pinakoteka, Kapela Sistina, kuatu sira  Raffaello nian, kolesaun Arte Relijioza Moderna, Muzeu Misionáriu Etnolójiku no Gruta sira Vaticano.

Tuir Prezidente Konsíliu Pontifísiu Komunikasaun Sosial nian arsebispu Claudio Maria Celli, iha loron 17 Setembru 2012, filme-dokumentáriu ne’e sai riku mós ho materiál istóriku iha audio no video propriedade  Filmoteca Vaticana nian. Filmoteca Vaticana dispoin sasin sira, dokumentáriu no filmajen oras 200 gravasaun orijinál époka ne’ebá nian, ne’ebé hatudu momentu signifikativu faze naruk preparasaun no modifikasaun estraordinária halo iha Bazílika S. Pedro, ne’ebé tempu ne’ebá prepara atu eventu Konsíliu nian bele realiza.

Tema prinsipál testu Konsíliu nian sai pontu análize nian ho deklarasaun husi personalidade na’in 14, entre sira kardeál, patriarka no arsebispu, ho objetivu atu komprende oinsá Konsíliu Vaticano II hetan resesaun/simun iha parte oioin mundu nian. Tema sira ne’ebé ohin loron sei ko’alia ba modernidade bele hetan iha dokumentu ofisiál sira elabora durante tinan tolu serbisu nian: Konstituisaun haat, Dekretu sia no Deklarasaun tolu.

Konstituisaun haat: Dei Verbum, Lumen Gentium, Sacrosanctum Concilium, Gaudium et Spes.

Dekretu sia: Ad Gentes, Presbyterorum Ordinis, Apostolicam Actuositatem, Optatam Totius, Perfectae Caritatis, Christus Dominus, Unitatis Redintegratio, Orientalium Ecclesiarum, Inter Mirifica.

Deklarasaun tolu: Gravissimum Educationis, Nostra Aetate, Dignitatis Humanae.

Nota: Bele konsulta dokumentu sira refere ba Konsíliu Vaticano II iha lia ofisiál sira iha site: www.vatican.va