Ita sei horik nafatin ho Na’i
Katekeze ho Papa Francisco
Papa Francisco fó kontinuidade, iha kuarta 15 Outubru, ba siklu katekeze kona-ba Kreda. Nia konsentra iha tema “Kreda espoza ne’ebé hein espozu”, Amu-Papa esplika katak sarani sira hein Jezús ne’ebé fila hikas, no iha tempu hein nian ne’e nia oris iha esperansa sarani, ne’ebé la’ós de’it otimizmu, maibé hein ho laran-manas ba realizasaun mistériu Maormak nia domin nian.
Kreda, Papa Francisco esplika, mak Maormak nia povu ne’ebé tuir Na’i Jezús no prepara an, loron ba loron, ba enkontru ho Nia, hanesan noiva ba ninia noivu. “’Nune’e mak ita sei horik nafatin ho Na’i: S. Paulo nia liafuan sira-ne’e mak liafuan furak liu Testamentu Foun nian”, nia dehan. “Liafuan simples, maibé ho desnidade boot esperansa nian”.
Livru Apokalipse nian aprezenta Kreda nu’udar noiva ne’ebé prepara an ba noivu: aprezenta la’ós nu’udar indivíduu simples ida, maibé nu’udar sidade, “Jerusalém foun”.
Tanba sidade mak símbolu relasionamentu umanu no konvivénsia nian, Papa Francisco esplika katak, agora kedas bele haree ona povu hotu halibur hamutuk iha tenda ida nia okos, Maromak nia tenda. Iha sidade ne’e, sei la iha ona egoízmu, la iha divizaun sosiál, étnika eh relijijoza, ema hotu sai ida iha Kristu.
Nune’e, ita sei to’o ba realizasaun kompleta projetu komuñaun no domin nian ne’ebé Maromak harii iha istória tomak. Kreda nia misaun ,ak mantein lakan lámpada esperansa nian, ne’ebé la’ós otimizmu simples ida. Ba sarani isa, esperansa mak hein ho laran-manas, ho domin boot, realizasaun ikus no definitiva mistériu Maromak nia domin nian
