Roma –  Ksolok boot ba Kapitulár FMA no Komunidade Edukativa atu taka sira-nia enkontru hamutuk husi loron 9 ho Peregrinasaun ba Vaticano atu tuir Papa Francisco nia Angelus.

Amu-Papa nia liafuan sira resoa maka’as iha Kapitulár sira nia fuan ne’ebé loron hirak ne’e reflete kona-ba “oinsá sai uma ne’ebé evanjeliza ho foin-sa’e sira”, hodi la sai autopreferensiál, hodi sai ba periferia oioin ohin loron nian. Komenta hotu tiha Evanjellu domingu ohin nian kona-ba konvidadu sira nia rekuza ba Na’i nia festa no Maromak nia gratuidade, laran-luak no universalidade, Papa Francisco kumprimenta peregrinu sira. Ksolok boot ba FMA sira atu rona Amu-Papa dirije pesoalmente ba sira hodi dehan “Ha’u kumprimenta ‘Figlie di Maria Ausiliatrice’  partisipante ba Kapítulu Jerál”.

Tuirmai konteúdu Angelus 12 Outubru 2014:

“Maun no biin-alin sira, bondia!

Iha Evanjellu domingu oihin nian, Jezús ko’alia kona-ba resposta ne’ebé ema fó Maromak nia konvite – reprezenta liuhusi liurai ida – atu partisipa iha festa kazamentu nian (kf Mt 22,1-14). Konvite iha karakterístika tolu: gratuita, laran-luak, universál. Konvidadu sira barak liu, maibé akontese buat ruma surprendente: sira ne’ebé Na’i hili molok la aseita atu hola parte iha festa, sira dehan katak iha buat seluk atu halo; liután, balun hatudu indiferensa, alienasaun, até aborresimentu. Maromak di’ak ho ita, oferese gratuitamente ninia amizade, oferese gratuitamente ninia ksolok, salvasaun, maibé dala barak ita lakohi simu ninia don sira, ita tau ih afatin dahuluk ita-nia preokupasaun materiál sira, ita-nia interese sira no mós bainhira Na’i bolu ita, dala barak ita hanoin nia fó aborresimentu mai ita.

Konvidadu balun até trata aat no oho atan sira ne’ebé hato’o konvite. Maibé, maski sira ne’ebé simu bolun falta iha adezaun, Maromak nia projetu la interrompe. Hasoru konvidadu dahuluk sira nia rekuza Nia la dezanima, la hapara festa, maibé propoin hikas konvite hodi habelar hakat liu limite razoavel hotu no haruka ninia atan sira ba lurón sira no dalan sikun hotu atu halibur ema hotu ne’ebé sira hetan. Ema naran de’it, kiak, abandonadu no lakon soin, ema di’ak no aat – ema aat mós simu konvite – lahó distinsaun. No sala sai nakonu ho ema “ezkluzu sira”. Evanjellu, ne’ebé ema seluk hakribi, hetan simun hein-laek husi fuan barak.

Maromak nia laran-di’ak la iha limite no la diskrimina ema ida: tanba ne’e festa mak Na’i nia don nian universál, ba ema hotu. Ba ema hotu fó posibilidade atu hatán ba ninia konvite, ninia bolun; laiha ema ida iha direitu atu sente nia an privilejiadu eh reklama ezkluzivu ida. Buat ne’e hotu lori ita atu supera kostume atu tau an iha sentru, hanesan amlulik ulun sira no farizeu sira. Ida-ne’e labele halo; ita tenke loke an ba periferia sira, hodi rekoñese mós katak ema ne’ebé iha ninin, liután, ida ne’ebé sosiedade rejeita no despreza mak sai objetu Maromak nia jenerozidade nian. Ita hotu simu bolun atu la redús Maromak nia Reinu iha limite kreda oan ida – ita-nia ‘kreda ki’ik-oan’ – maibé atu haluan Kreda ba dimensaun Maromak nia Reinu nian. Iha kondisaun ida de’it: hatais faru festa nian katak fó sasin karidade ba Maromak no ba maluk.

Ita entrega ba Maria Santíssima nia intersesaun drama no esperansa sira ita-nia maun no biin-alin sira nian, sira ne’ebé ema ezklui, sira ne’ebé ema despreza, sira ne’ebé ema persege mós tan motivu fiar nian, no ita husu ninia protesaun ba serbisu “Sínodu Bispu sira-nian” halibur loron hirak ne’e iha Vaticano”.