Loron 30 fulan Outubru tinan 2024, hafoin Audiénsia Jerál iha Prasa S. Pedro iha Roma, FMA ida husi Timór Leste entrega ba Papa Francisco nia teze nebe’è hakerek kona-ba Pontífise nia estilu komunikasaun nian.

Roma (Itália). Iha loron 30 fulan Outubru tinan 2024, grupu ida Filhas de Maria Auxiliadora husi Komunidade Maria Auxiliadora Casa Jeral (RCG) nian partisipa iha audiénsia jerál Papa Francisco nian kona-ba “Krisma, sakramentu Espíritu Santu nian” iha prasa Saun Pedro iha Roma.

Entre sira, Irmán Maria Sarmento Guterres, FMA husi Inspetoria Maria Mazzarello (TIN), Timór Leste nian, hetan oportunidade inkontru pesoál ho Santu Padre hodi oferese ba nia teze baxarelatu nian, ne’ebé nia hakerek dedika ba Amu-Papa Francisco, komunikadór di’ak ida.

Irmán Maria halo graduasaun iha loron 4 fulan Outubru 2024 iha Siénsia Komunikasaun nian, enderesu pastorál, iha Universidade Pontífisia Saleziana (UPS) Roma ho teze nia títulu: “Haree, rona, ko’alia ho fuan”. Paradigma kultura inkontru Papa Francisco nian iha ninia mensajen sira ba JMKS (2021-2023)”.

Emosaun boot tebes bainhira, to’o audiénsia remata, Amu-Papa hakbesik hodi kumprimenta ema sira ne’ebé prezente iha fatin ne’ebe hanaran sagradu. Ba ema ida-idak, Nia hanesan aman ida, dedika nia tempu tomak, maske loron manas maibe Papa ho pasiensia boot atu rona, hateten liafuan uitoan no fó nia bensaun. Irmán Maria nia istória:

“Bainhira ha’u hetan oportunidade atu partisipa iha enkontru ida-ne’e, ha’u la fiar. Ida-ne’e hanesan mehi ida, eventu ida ne’ebé ha’u hein, maibé ha’u la imajina katak ida-ne’e bele akontese. Emosaun no ansiedade kahur iha ha’u nia laran bainhira ha’u prepara an ba momentu ne’ebá.

Ha’u pasa fulan barak hodi hakerek ha’u nia teze hodi analiza kona ba Papa Francisco nia maneira estraordináriu atu komunika, nia kapasidade atu kona ema nia fuan ho ninia hateken no nia jestu sira. Ha’u nunka imajina katak, ha’u sei hetan oportunidade ida ne’e atu aprezenta ha’u-nia servisu ba Amu-Papa.

To’o iha audiénsia, atmosfera nakonu ho emosaun. Ema sira iha ha’u nia sorin mós emosionadu no kontente. Bainhira Papa Francisco mai, laloran ida laran-manas no ksolok nian pasa liu hosi espasu ida-idak ne’ebè Nia sei liu, halakan ho ninia hamnasa midar, ninia hateken ne’ebé trasmete umanidade ida ne’ebé kle’an.

Bainhira to’o ona tempu atu hakbesik ha’u, ha’u sente emosaun makas. Kaer ha’u-nia teze no selendang típiku Timor nian iha ha’u-nia liman, ha’u hakbesik ba Nia Ho ha’u-nia fuan ne’ebé tuku maka’as, hahú dehan: ‘Santidade, ha’u mak filhas de Maria Auxiliadora ida, ha’u mai husi Timor Leste. Ho ksolok boot atu aprezenta ha’u nia teze ba ita-boot. Ha’u dedika hakerek ida-ne’e ba ita-boot, ba ita-boot nia estilu komunikasaun ne’ebé maka ezemplar.

Amu-Papa kaer teze ne’e iha nia liman, hare ninia kotuk no hare oituan iha libro nia laran, hodi komenta: ‘Interesante… furak!’. Entaun ha’u husu se ha’u bele oferese ha’u nia serbisu ba Nia no nia agradese ha’u ho laran tomak, no hodi fo parabens dal ida tan ba Nasaun Timor –Leste, hateten katak “ o nia paese mak paese ida ne’ebé furak liu, parabens”.

Naturalmente ha’u labele sai sein husu nia bensaun ba ha’u nia rain – ne’ebé nia vizita iha fulan Setembru tinan 2024 – no ba ami nia Institutu; la hein, Amu-Papa fó mai ha’u prezente bensaun ida-ne’e.

Bainhira sai hosi audiénsia, ha’u nia fuan sai kmaan. Ha’u iha oportunidade atu fahe parte ida husi ha’u nia moris ho Maromak nia ema ida ne’ebé loos ha’u sei lori ho ha’u ba nafatin memória husi inkontru ne’ebá, nu’udar inspirasaun nabilan nian ne’ebé laiha rohan. Ha’u nia teze la’ós de’it serbisu akadémiku ida, maibé ponte ida entre ha’u nia aspirasaun sira atu sai mensajeira di’ak ida no realidade modelu komunikasaun ida ne’ebé estraordináriu.”