21 Janeiru

Iha istória haktuir katak komersiante ida rezidente iha rejiaun Duey, ohin loron koñesida nu’udar Salvaléon de Higuey, halo viajen negósiu nian ba Santo Domingo no simu husi oan-feto ida pedidu atu lori ilas Na’i-Feto Altagrácia nian.

Mane ne’e buka imajen ne’e iha livraria no igreja sira hotu, até mós husi amlulik no Arsebispu Santo Domingo nian, maibé la iha rezultadu. Ema barak mak la hatene imajen “Santa Maria de Altagrácia”, maski iha kultu ba nia.

Kommersiante fila bá uma ho laran la haksolok tanba la konsege halo tuir nia oan-feto nia hakaran. Iha Duey, nia hasoru katuas ida ho obun-rahun mutin naruk ne’ebé nia tula iha viajen, no hahú dada lia ba malu.

Iha ninia diálogu ho komersiante ne’e, katuas ne’e hatene katak mane ne’e la kontente tan la hetan buat ne’ebé nia buka. Nune’e, nia loke ninia sakola no hasai hena ida lulun hela, no iha hena ne’e iha pintura ne’ebé nia buka loos. Imajen ne’ebé reprezenta Maria, Maromak Inan, kontempla hela Kosok-Oan Jezús toba iha balada han fatin. Iha nia sorin iha S. José, ne’ebé fihir ho laran-kmaus ba Maromak nia Oan. Iha hena nia leten, iha naroman ne’ebé leno Kosok-Oan nia oin.

To’o iha uma, aman ne’e entrega enkomenda folin boot ne’e ba oan-feto, prezente husi katuas misteriozu, ne’ebé ikusmai nia la rona tan ona buat ida kona-ba nia. Iha lokál rezidénsia nian, ikusmai harii templu ida, ne’ebé ohin loron koñesidu nu’udar Santuáriu Nasionál Higuey nian. Hena ho pintura tau iha altar-mor parókia nian, nune’e, imajen Na’i-Feto Altagrácia nian hetan vizita loroloron husi peregrina/u barak.

Altagrácia sai naran destake nian iha rai dominikana sira (Santo Domingo) no mós iha rai sira seluk, hanesan Haiti. Iha 1876, liurai Afonso XII kondekora João Alés Escobar, eis-governadór sivíl Cuba nian, ho título “Marquês de Altagrácia”. Iha Argentina, iha provínsia Córdoba nian, iha sidade nian hanaran Altagrácia, nu’udar omenajen ba kultu dominikanu.

“Nossa Senhora de Altagrácia” mak Padroeira República Dominicana nian.